Almatyda qyrkúıekte 3 kósheniń uzartylǵan ýchaskeleri ashylady — Almaty ákimi
ALMATY. KAZINFORM — Almatyda magıstraldy kóshelerdi uzartý jumystary júrip jatyr.
Almaty ákimi Darhan Satybaldy bul jumystardyń qalaı júrip jatqanymen áleýmettik jelidegi paraqshasynda bólisti. Qala basshysynyń jazýynsha, shahar shekarasyna deıin jáne odan ári Úlken Almaty avtomobıl aınalma jolyna (ÚAAAJ) deıin uzartylatyn kóshelerde jer telimderin satyp alý jumystarymen qatar ınjenerlik kommýnıkatsııalardy kóshirý jáne jol tóseminiń negizin daıyndaý jumystary júrgizilip jatyr.
Almaty ákimi qyrkúıek aıynda birneshe ýchaskede kólik qozǵalysyn ashýdy tapsyrǵanyn atap ótti. Olar:
— Rysqulov dańǵylynyń Ońǵarsynova kóshesinen qala shekarasyna deıingi jańa ýchaskesi;
— Tóle bı kóshesiniń ıAssaýı kóshesinen Áshimov kóshesine deıingi jáne odan ári qala shekarasyna deıingi eki ýchaskesi;
— Jubanov kóshesiniń Karernaıa kóshesinen qala shekarasyna deıingi birinshi ýchaskesi.
Sondaı-aq Abaı dańǵyly boıynsha da merzim ózgermeıdi — bıyl jol ÚAAAJ-ǵa qosylýy tıis.
— Bul jobalar qalanyń kólik ınfraqurylymyn damytýdaǵy basym baǵyttardyń biri. Sondyqtan olardy turaqty baqylaýymda ustap otyrmyn. Jer telimderin satyp alý, ınjenerlik kommýnıkatsııalardy kóshirý máselesi boıynsha turaqty túrde keńester ótkizip, týyndaǵan túıtkildi jedel qarastyryp kelemiz, — dep jazdy Darhan Satybaldy.
Eske salaıyq, buǵan deıin Soltústik aınalma joly, Tilendıev, Saın kósheleri, sondaı-aq Rysqulov pen Abaı dańǵyldary Úlken Almaty avtomobıl aınalma jolyna deıin uzartylatynyn jazǵanbyz.
