Almatyda qylmystyń 80%-dan astamyn basqa óńirden kelgen adamdar jasaıdy - polıtsııa
ALMATY. KAZINFORM – 2026 jyldyń alǵashqy bes aıynda Almatyda qylmys deńgeıi tómendedi. Alaıda polıtsııanyń dereginshe, qaladaǵy qylmystyń basym bóligin basqa óńirlerden kelgen azamattar jasaıdy.
Almaty Polıtsııa departamentiniń resmı ókili Saltanat Ázirbek búginde shamamen 7 myń polıtsııa qyzmetkeri qala turǵyndarynyń qoǵamdyq tártibi men qaýipsizdigin táýlik boıy qamtamasyz etip otyrǵanyn habarlady.
– Jalpy alǵanda, Almatydaǵy qylmyspen baılanysty jaǵdaı turaqty jáne baqylaýda, - dedi Saltanat Ázirbek Óńirlik kommýnıkatsııalar qyzmetinde ótken brıfıng kezinde.
2026 jyldyń bes aıynyń qorytyndysy boıynsha qalada qylmys deńgeıi 10,9% tómendegen, al qylmystardy ashý kórsetkishi 5,6% artqan. Sonymen qatar qoǵamdyq oryndarda jáne buryn sottalǵan adamdar tarapynan jasalǵan quqyq buzýshylyqtar sany aıtarlyqtaı azaıǵan. Polıtsııa málimetinshe, Almatyda qylmys deńgeıi úsh jyl qatarynan tómendep keledi.
– Taldaý nátıjeleri boıynsha qylmystardyń 80%-dan astamy basqa qalalardan kelgen adamdar tarapynan jasalatyny, sondaı-aq aýyr quqyq buzýshylyqtardyń edáýir bóligi alkogoldik ishimdik tutynyp, mas kezinde bolatyny anyqtalǵan. Osyǵan baılanysty qoǵamdyq oryndarda patrýldeý kúsheıtilip, jergilikti jáne qalalyq profılaktıkalyq is-sharalar turaqty túrde júrgizilip jatyr, - dep habarlady polıtsııa ókili.
«Alko-stop» aktsııasy aıasynda 625 quqyq buzýshy ákimshilik jaýapkershilikke tartylǵan. Alkogol ónimderin zańsyz satqan 243 kásipker jazalanyp, zańsyz aınalymnan jalpy quny 40 mıllıon teńgeden asatyn 13 tonnadan astam alkogol tárkilengen.
Kóshi-qon baqylaý salasynda da aýqymdy jumys júrgizilip jatyr. «Qonys» jedel-profılaktıkalyq is-sharasy barysynda tirkeýsiz turǵan 7,8 myńnan astam azamat jáne kóshi-qon zańnamasyn buzǵan 700-den astam shetel azamaty jaýapqa tartylǵan. 174 sheteldik el aýmaǵynan shyǵarylǵan.
– Internet-alaıaqtyqpen kúreste de oń dınamıka baıqalady. Bes aı ishinde tirkelgen faktiler sany 14,2% azaıǵan. Banktermen birlesip, 50 mıllıon teńgeden astam somaǵa jasalýy múmkin 67 alaıaqtyq árekettiń aldyn alǵan. Sonymen qatar qylmystyq maqsatta paıdalanylǵan shamamen 20 myń ınternet-resýrs buǵattalǵan, - dedi Saltanat Ázirbek.
Esirtki qylmystaryna qarsy is-qımyl baǵytynda 342 quqyq buzýshylyq anyqtalyp, zańsyz aınalymnan 143 keliden astam esirtki zattary tárkilengen. Sondaı-aq esirtki taratýǵa qatysty myńnan astam ınternet-saıt buǵattalǵan.
Jol qozǵalysy qaýipsizdigi de erekshe nazarda. Jyl basynan beri 1,4 mıllıonnan astam jol qozǵalysyna qatysýshy jaýapqa tartylǵan, alkogoldik ishimdik iship, kólikti mas kúıde basqarǵan myńnan astam júrgizýshi ustalyp, 1 400-den astam adam kólik júrgizý quqyǵynan aıyrylǵan.
Polıtsııa málimetinshe, búginde Almatyda 200 myńnan astam beınebaqylaý kamerasy jumys isteıdi, olardyń 73 myńnan astamy Jedel basqarý ortalyǵyna qosylǵan. 19 myńnan astam kamera beıne-taldaý jáne jasandy ıntellekt tehnologııalarymen jabdyqtalǵan.
Eske salaıyq, buǵan deıin Almatyda 50-ge jýyq urlyq jasaǵan alty qylmystyq top ustalǵanyn habarlaǵanbyz.
