Almatyda qylmys deńgeıi 13%-ǵa tómendedi — ІІM
ASTANA. KAZINFORM — Іshki ister mınıstri Erjan Sadenov jumys saparymen Almaty qalasyna baryp, kámeletke tolmaǵandarǵa arnalǵan jańa kolonııanyń qyzmetimen tanysty. Bul týraly Polisia.kz jazdy.
Mınıstr nysan ınfraqurylymyn qarap, jasóspirim sottalǵandardyń ustalýy úshin jasalǵan jaǵdaılardy, bilim berý baǵdarlamalaryn jáne áleýmettik beıimdeý tásilderin baǵalady. Joba qylmystyq-atqarý júıesin jańǵyrtýdaǵy mańyzdy qadam boldy.
Mınıstr sondaı-aq óńirlik QAJ departamenti bastyǵynyń esebin tyńdap, qyzmetti odan ári jetildirý boıynsha negizgi mindetterdi aıqyndady. ІІM delegatsııasy Almaty qalasy polıtsııa departamenti mýzeıiniń ashylýyna da qatysty. Aýdany 272 sharshy metr bolatyn nysanda arhıvtik materıaldar, fotosýretter, ár jyldardaǵy formalyq kıim úlgileri, tehnıka men marapattar bar.
Onda megapolıs polıtsııasynyń damý tarıhy kórsetilgen. Qurmetti qonaqtarǵa arnalǵan kitapqa mınıstr estelik jazba qaldyrdy. Jumys baǵdarlamasy aıasynda Erjan Sadenov «Qazaqstan sanatorııine» bardy.
Bul — ishki ister organdary qyzmetkerleri men ardagerlerine arnalǵan zamanaýı saýyqtyrý ortalyǵy. Munda densaýlyqty nyǵaıtýǵa qajetti barlyq jaǵdaı jasalǵan. Sonymen qatar departamenttiń jeke quramy jáne Ulttyq ulannyń óńirlik qolbasshylyǵynyń qatysýymen jedel keńes ótti.
Mınıstr jedel-qyzmettik jumys qorytyndylaryn shyǵaryp, aldaǵy ýaqytqa basym baǵyttardy belgilep, PD bastyǵynyń, Ulttyq ulan óńirlik qolbasshysynyń jáne basqa da qyzmet basshylarynyń esepterin tyńdady. Ol Memleket basshysy qoıǵan basty mindet — Zań men Tártipti qamtamasyz etý ekenin erekshe atap ótti.
— Almaty — eldegi eń iri megapolıs. Almatylyq polıtsııa qyzmetkerleriniń kásibıligi mıllıondaǵan turǵyndar men qala qonaqtarynyń qaýipsizdigi men tynyshtyǵyna tikeleı áser etedi, — dedi mınıstr. Onyń aıtýynsha, qalada qylmyspen kúres boıynsha keshendi sharalar qabyldanǵan, bul óz nátıjesin kórsetýde: qylmys deńgeıi 13%-ǵa tómendegen, kisi óltirý, aýyr dene jaraqatyn keltirý, urlyq, alaıaqtyq, tonaý, qaraqshylyq, retsıdıv jáne kóshe qylmystary da aıtarlyqtaı azaıǵan. ІІM basshysy qoǵamdyq tártipti saqtaý máselesine erekshe nazar aýdardy. Ol patrýldik polıtsııa, áskerı jasaqtar jáne keshendi kúshterdiń kásibı deńgeıin arttyrý mindetterin júktep, basty qaǵıdat retinde sypaıylyq pen talapshyldyq saqtalýy tıis ekenin aıtty. — Zań men Tártip — bul jaı uran emes, qalypty ómirdiń negizi. Árbir azamat qaýipsiz elde ómir súrgisi keledi. Bul — bizdiń kúndelikti jumysymyz. Biraq kóp nárse azamattardyń sanaly áreketine de baılanysty, — dedi Erjan Sadenov.
Mınıstr óńirlik bólinisterdiń jumysyndaǵy keıbir kemshilikterge toqtalyp, profılaktıkalyq jumysty kúsheıtý, azamattardyń ótinishterin sapaly jáne ýaqtyly qaraýdy qamtamasyz etý, sondaı-aq ishki ister organdarynyń tıimdiligin arttyratyn tsıfrlyq sheshimderdi engizýdi jalǵastyrý boıynsha naqty tapsyrmalar berdi. Sóz sońynda Erjan Sadenov quqyq qorǵaý júıesin odan ári nyǵaıtý úshin tártip, jaýapkershilik jáne jeke quramnyń úılesimdi jumysy qajet ekenin atap ótti. Modernızatsııa, ashyqtyq jáne tıimdilikti arttyrý baǵyty júıeli túrde jalǵasyp, qoıylǵan mindetter tolyq kólemde oryndalýy tıis.
Buǵan deıin Almaty polıtsııasy medıtsınalyq kolledjdegi tóbeleske baılanysty tekserý júrgizip jatqanyn jazdyq.