Almatyda qıyn ómirlik jaǵdaıǵa tap bolǵan balaly áıelderge arnalǵan daǵdarys ortalyǵy ashyldy
ASTANA. KAZINFORM – Almaty qalasynda qıyn ómirlik jaǵdaıǵa tap bolǵan balaly áıelderge arnalǵan jańartylǵan «Asar» daǵdarys ortalyǵynyń resmı tusaýkeseri ótti.
Bul joba ajyrasýdyń aldynda turǵan otbasylarǵa jaǵdaı jasaýdaǵy mańyzdy qadam boldy.
«Asar» ortalyǵy 2017 jyly Almaty qalasynyń SOS balalar aýylynyń bazasynda quryldy jáne sodan beri qoldaý men qorǵaýdy qajet etetin balaly áıelderge kómek kórsetip keledi.
Ortalyqqa 2024 jyly «Halyk» qorynyń demeýshiligimen kúrdeli jóndeý jumystary júrgizilip, turmystyq jaǵdaı jaqsardy. Ortalyq bir ýaqytta alty otbasyn qabyldaı alady, olar úshin jeke bólmeler men ortaq aýmaqtar qarastyrylǵan. Negizgi maqsattary: alty aıǵa deıin ýaqytsha baspana berý, medıtsınalyq, zańdyq, psıhologııalyq qoldaý, jumysqa ornalasýǵa jáne qaıta oqýǵa kómek kórsetý, balalarǵa qamqorlyq jasaý daǵdylaryn nyǵaıtý.
«Asar» ortalyǵynyń ereksheligi - áıeldermen jumys barysynda ár jaǵdaıǵa jeke qaraýǵa múmkindik beretin ozyq halyqaralyq ádistemelerdi qoldanýynda. Osy ádisteme arqyly ortalyqtaǵy árbir áıelge daǵdarystan shyǵýdyń kezeń-kezeńdik jeke jospar jasalyp, ony júzege asyratyn maman bekitiledi.
«Basty jetistik – ata-analardyń ózine degen senimdiligin arttyrý jáne qıyndyqtardy óz betinshe jeńý qabiletterin damytý. Baǵdarlama aıasynda biz otbasylarmen baılanysta bolamyz jáne olardyń ál-aýqatyn baqylaýdy jalǵastyramyz», - deıdi SOS Balalar aýyly Qazaqstan Korporatıvtik qorynyń ulttyq dırektory Gúljan Asanova.
Ortalyq ashylǵan kúninen bastap 150-den astam bala anasynan ajyramaı, 80-nen astam áıel ýaqytsha baspana jáne qoldaý aldy. Olardyń 90%-dan astamy óz betterinshe ómir súrip, mamandyq alyp, jumys taýyp, turaqty baspanaǵa qol jetkizdi.
«Erteń qaıda qonatynymyzdy bilmeı júrgen qıyn sátterde, ortalyq týraly aqparat bizge naǵyz qutqarýshymyzdaı kórindi». Ortalyqtyń qoldaýynyń arqasynda Aınur jańa mamandyq ıgerip, kásibı deńgeıin jańa satyǵa kótergen. «Ortalyq qyzmetkerlerine jáne «Halyk» qaıyrymdylyq qoryna alǵysym sheksiz», - deıdi úsh balanyń anasy, «Asar» ortalyǵynyń burynǵy turǵyny Aınur (aty ózgertilgen).
Qazaqstanda 1994 jyldan beri jumys istep kele jatqan SOS balalar aýyldary ata-anasynyń qamqorlyǵynsyz qalǵan balalarǵa otbasylyq jaǵdaı jasaıdy, sonymen qatar jetimdiktiń aldyn alý boıynsha jobalardy belsendi túrde júzege asyrady. SOS otbasyn qoldaý ortalyqtarynyń negizinde júzdegen balalar ata-analarynan aıyrylmaýǵa tyrysady, al asyrap alýǵa úmitkerler oqýdan ótedi, bul qordyń jobalaryn qoǵam úshin erekshe mańyzdy etedi.
