Almatyda kıberqylmystan zardap shekkenderge 700 mln teńge qaıtaryldy
ALMATY. KAZINFORM – Almatyda 300-den astam kıberqylmys ashyldy. Bul týraly qalalyq polıtsııa departamentiniń bastyǵy Aıdyn Qabduldınov málimdedi.
Onyń aıtýynsha, ótken jyly 2 myńnan astam ınternet-alaıaqtyq deregi tirkelgen. Qazir kıberqylmysqa qarsy kúres ekinshi deńgeıli banktermen birge júzege asyrylyp keledi. Bul kúmándi qarjylyq operatsııalardy der kezinde anyqtaýǵa, shottardy buǵattaýǵa jáne azamattardyń qarajatyn jymqyrýdyń aldyn alýǵa múmkindik beredi.
- Nátıjesinde mamandandyrylǵan bólimshe tarapynan aqparattandyrý jáne baılanys salasynda 300-den astam qylmystyq quqyq buzýshylyq ashyldy. Keńse jaǵdaıynda áreket etken call-ortalyqtyń qyzmeti toqtatyldy. Sonymen qatar bank shottaryna zańsyz qol jetkizý faktileri áshkerelendi. Alaıaqtyq maqsatta paıdalanylǵan 17 myńnan astam ınternet-resýrs buǵattaldy, – dedi departament basshysy.
Sonymen qatar 2025 jyldyń qyrkúıeginen bastap dropperlikke qatysty qylmystyq jaýapkershilik engizilip, mundaı júzdegen derek anyqtaldy. Odan bólek alaıaqtarǵa aqsha aýdarýdyń 185 áreketi toqtatylǵan jáne azamattarǵa keltirilgen shyǵyndy óteý maqsatynda 702 mıllıon teńge qaıtarylǵan.
Eske salaıyq, buǵan deıin polıtsııa kıberqylmystyń jańa túri týraly eskertti.
