Almatyda kıberalaıaqtardan 5 myńnan asa SIM-karta tárkilendi

ASTANA. KAZINFORM — QMA Almaty qalasy boıynsha departamenti úsh sheteldik azamatty ustap, jalǵa alǵan páterde tintý júrgizý barysynda alty SIM-boks anyqtap, tárkiledi.

Bul qurylǵylar alaıaqtyq shemalarda keń kólemde qońyraýlar jasaý, habarlamalar jiberý jáne abonenttik nómirlerdi ózgertý úshin qoldanylady. Sondaı-aq, ártúrli mobıldi operatorlardyń 5 myńnan astam SIM-kartasy tárkilendi.

— Atalǵan tulǵalarǵa qatysty QR Qylmystyk kodeksiniń 213-baby 2-bóligi — «uıaly baılanys abonenttik qurylǵysynyń ıdentıfıkatsııalyq kodyn zańsyz qoldaný, abonentti sáıkestendirý qurylǵysyn zańsyz ózgertý jáne ıdentıfıkatsııalyq kodty ózgertýge arnalǵan baǵdarlamalardy jasaý, paıdalaný, taratý» boıynsha qylmystyq is tirkeldi. Kúdiktiler eki aı merzimge qamaýǵa alyndy. Olardyń ınternet-alaıaqtyqqa qatystylyǵy tekserilip jatyr, — dedi QMA resmı ókili Ernar Taıjan.

QR QІJK-niń 201-babyna sáıkes ózge de aqparat jarııalaýǵa jatpaıdy.

Buǵan deıin QMA «Buyers Union» qarjy pıramıdasynyń jumysyn toqtatqany belgili boldy.