Almatyda kıber alaıaqtardyń áreketi toqtatyldy
ASTANA. KAZINFORM — Búgin prokýratýranyń úılestirýimen jáne «Qazaqtelekom» AQ-men yntymaqtasa otyryp, UQKD jáne qalanyń PD jedel súıemeldeýimen Qazaqstannyń eki azamaty ustaldy.
«Internet-alaıaqtyqtyń zamanaýı túrleriniń aldyn-alý» jobasyn iske asyrý sheńberinde Almaty qalasynyń prokýratýrasy kıberqylmyspen baılanysty qylmystyq shemalardy anyqtaý jáne jolyn kesý jóninde belsendi jumysty jalǵastyryp otyr.
Tergeý málimetterine sáıkes olar, sheteldik seriktestermen sóz baılasyp, ınternet-alaıaqtyq shemasyn iske asyrý kezinde olarǵa zańgerlik kómek kórsetken. Kún saıyn osy shemany paıdalana otyryp, aqshalaı qarajatty urlaý maqsatynda eldegi azamattarǵa kúnine 2000-ǵa deıin qońyraý shalǵan.
— Qazirgi ýaqytta tergeý amaldary júrgizilip, qylmystyq árekettiń barlyq mán-jaıy anyqtalyp jatyr. Almaty qalasynyń prokýratýrasy azamattardy uqypty bolýǵa, belgisiz adamdardyń qońyraýlaryna senbeýge, derbes málimetteri men bank derektemelerin bermeýge shaqyrady. Kúdikti áreketter baıqalǵan jaǵdaıda dereý quqyq qorǵaý organdaryna júginý qajet, — delingen habarlamada.
Eske sala keteıik, buǵan deıin QMA Jetisý oblysy boıynsha departamenti sýbsıdııa jymqyrý faktisi boıynsha tergeý júrgizip jatqanyn jazǵan edik.