Almatyda keı áleýmettik tólem túrleri qysqardy: neni bilý qajet

Sessııa barysynda Almatyda áleýmettik kómek kórsetý qaǵıdalaryna ózgeris engizý máselesi qaraldy. Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov qaladaǵy áleýmettik kómek tetikterin biryńǵaı respýblıkalyq tásilderge sáıkestendirý qajet ekenin atap ótti.

Aıtýynsha, osy kúnge deıin jergilikti bıýdjetten beriletin áleýmettik kómek azamattardyń muqtajdyǵy eskerilmeı, olardyń sanatyna baılanysty berilgen. Onyń ornyna Eńbek jáne halyqty áleýmettik qorǵaý mınıstrligi usynǵan skorıngtik model usynyldy. Adamdardyń ál-aýqaty 1-5 deńgeı aralyǵynda baǵalanyp, áleýmettik kómek naqty muqtaj jandarǵa beriledi. Atap aıtqanda:

1. Asa muqtajdyq;

2. Muqtajdyq;

3. Salystyrmaly túrde turaqty jaǵdaı;

4. Turaqty jaǵdaı;

5. Jaıly.

Sondaı-aq usynylǵan ózgerister boıynsha merekelik jáne ataýly kúnderge beriletin áleýmettik kómek endi 5-10 myń teńge kóleminde berilmeıdi. Mundaı tólemderdiń tómengi shegi keminde 5 AEK (21 625 teńge) bolýy tıis.

Mańyzdy ózgeristerdiń biri — ortasha tabysy eń tómengi kúnkóris deńgeıinen aspaǵan jaǵdaıda beriletin áleýmettik kómek respýblıkalyq eń tómengi kúnkóris deńgeıine teńestirildi. ıAǵnı, buryn Almatyda aılyq tabysy 71 515 teńgege deıingi azamattar muqtaj retinde tanylyp, kómek ala alsa, jańa usynys boıynsha bul shek 50 851 (respbýlıkalyq deńgeı) teńgege deıin tómendeıdi.

Qysqarǵan áleýmettik tólem túrleri

Máslıhat sheshimi boıynsha Almatyda áleýmettik kómektiń jekelegen túrleri qysqartyldy. Olar:

— Jeke turǵyn úı ıesine gaz jabdyqtaryn ornatýǵa beriletin tólem. Baýyrjan Jaýbasovtyń aıtýynsha, bul kómek túrine qazir suranys az. Byltyr turǵyndardan eki, al bıyl bir ǵana ótinish túsken.

— Kópbalaly otbasylardan shyqqan úzdik stýdentterge beriletin 10 000 teńge mólsherindegi syıaqy. Baýyrjan Jaýbasov bul áleýmettik tólem kópbalaly otbasylardyń stýdent balalaryna berilip kelgenin, alaıda sońǵy úsh jylda oǵan suranys bolmaǵanyn atap ótti.

— Túzeý mekemelerinen bosatylǵan tulǵalar 1,5 aı ishinde 10 AEK mólsherinde beriletin birjolǵy áleýmettik tólem. Jumyspen qamtý jáne áleýmettik baǵdarlamalar basqarma basshysynyń sózinshe, qazir bul tólem respýblıka boıynsha alynyp jatyr. Sebebi bas bostandyǵynan aıyrý oryndarynan bosatylǵan adamdar ómirlik qıyn jaǵdaıǵa tap bolǵan kez kelgen azamat sııaqty 20 AEK kóleminde birjolǵy tólem alýǵa quqyly.

— 6,5 AEK kólemindegi turǵyn úı tólemderi. Baýyrjan Jaýbasov bul tólem de 20 AEK mólsherindegi birjolǵy tólemniń quramyna enetindikten alynyp tastalatynyn aıtty.

Sonymen qatar buǵan deıin halyqtyń áleýmettik osal toptaryna jergilikti bıýdjetten 1 mıllıon teńge kóleminde turǵyn úı sertıfıkattary berilip kelgen. Alaıda bul sertıfıkattar endi respýblıkalyq bıýdjetke aýysty. Sondyqtan bul tólem qala ákimdiginiń quzyretinen alynyp tastaldy.

Eske salaıyq, buǵan deıin Almatyda jeltoqsanshylarǵa beriletin bir jolǵy tólem 250 myńnan 400 myń teńgege deıin artty.