Almatyda keshki júgirý estafetasyna baılanysty qaı kóshelerde qozǵalys shekteledi

Almaty ákimdiginiń habarlaýynsha, 18 shilde, senbi kúni Summer Relay jazǵy keshki estafetasy ótedi. Bıyl jarys alǵash ret qalanyń tarıhı ortalyǵy arqyly ótetin jańa baǵytta uıymdastyrylady. Osyǵan baılanysty qalanyń birqatar ortalyq kóshede kólik qozǵalysy ýaqytsha shekteledi.

Jarystyń sóresi men máresi — «Astana» alańy. Estafeta baǵyty Tóle bı, Qabanbaı batyr, Panfılov kósheleri jáne Abylaı han dańǵyly arqyly ótedi.

— Jarys baǵyty Tóle bı, Qabanbaı batyr, Panfılov kósheleri men Abylaı han dańǵyly arqyly ótedi. Qatysýshylar Qazaqstan Jazýshylar odaǵynyń ǵımaraty, Qurmanǵazy atyndaǵy Qazaq ulttyq konservatorııasy, «Almaty» qonaq úıi, Jambyl Jabaev eskertkishi, Abaı atyndaǵy Qazaq memlekettik akademııalyq opera jáne balet teatry, sondaı-aq Temirbek Júrgenov eskertkishiniń janynan júgirip ótedi, — delingen habarlamada.

Jarysqa baılanysty kólik qozǵalysyna mynadaı ýaqytsha shekteý engiziledi:

• 18 shilde saǵat 09:00–den 19 shilde saǵat 06:00–ge deıin — Tóle bı kóshesinde (Panfılov kóshesinen Abylaı han dańǵylyna deıin);
• 18 shilde saǵat 20:00–den 23:00–ge deıin — Abylaı han dańǵylynda (Tóle bı kóshesinen Qabanbaı batyr kóshesine deıin);
• 18 shilde saǵat 20:00–den 23:00–ge deıin — Qabanbaı batyr kóshesinde (Abylaı han dańǵylynan Nazarbaev dańǵylyna deıin);
• 18 shilde saǵat 20:00–den 23:00–ge deıin — Panfılov kóshesinde (Qabanbaı batyr kóshesinen Tóle bı kóshesine deıin).

Jarys baǵdarlamasy saǵat 18:00–de balalar jarysymen bastalady. Saǵat 20:00–de 2 shaqyrymdyq júgirý, al 21:00–de Summer Relay negizgi estafetasy ótedi.

Uıymdastyrýshylar qala turǵyndary men qonaqtaryna kólik qozǵalysyna engiziletin ýaqytsha shekteýdi eskerip, baǵytyn aldyn ala josparlaýǵa keńes berdi.

Eske salaıyq, buǵan deıin Almatyda LRT jobasyn júzege asyrý aıasynda Tóle bı kóshesinde kólik qozǵalysyna ýaqytsha shekteý engiziletinin jazǵanbyz.