Almatyda keptelisti retteıtin Jol qozǵalysyn uıymdastyrý ortalyǵy qashan ashylady

ALMATY. KAZINFORM — Jańa ortalyq qaladaǵy keptelisterdi azaıtý maqsatynda jumys isteıtin bolady.

Bıyl qala turǵyndarymen kezdesýi kezinde Almatynyń eks-ákimi Erbolat Dosaev megapolıste Jol qozǵalysyn uıymdastyrý ortalyǵy quralytynyn atap ótti. Onyń aıtýynsha, polıtsııa qaýipsizdik suraqtaryna jaýap berse, al jol qozǵalysyn ákimdik basqaratyn bolady. 

Osy oraıda, Kazinform agenttigi Qalalyq mobıldilik basqarmasyna saýal joldap, bul ortalyq qashan qurylatynyn surady.

Basqarma jaýabyn sáıkes, Almaty qalasynyń aýqymdy jobasy — Jol qozǵalysyn uıymdastyrý ortalyǵynyń (JQUO) iske qosylýy 2026–2027 jyldarǵa josparlanǵan.

— Bul joba jol qozǵalysyn uıymdastyrý salasyndaǵy sheshimderdi qabyldaıtyn naqty bir ortalyqty aıqyndaýdy qamtıdy. Keptelistermen kúresýge baǵyttalǵan naqty sharalar atalǵan ortalyqty damytý barysynda ázirlenip, usynylady, — delingen vedomstvo jaýabynda.

Sonymen qatar Almatynyń Qalalyq mobıldilik basqarmasy el zańnamasyna sáıkes, polıtsııanyń ókilettikteri basqa tulǵalarǵa berilmeıtinin, al Jol qozǵalysyn uıymdastyrý ortalyǵy tek jekelegen fýnktsııalardy oryndaıtynyn málimdedi.

— Almaty qalasynyń JQUO shtat quramyna kólik ınjenerleri, kólikti josparlaý jáne modeldeý mamandary, ıntellektýaldy kólik júıesimen jumys isteıtin mamandar, qoǵamdyq kólikpen jumys isteý boıynsha mamandar, aqparattyq júıelerdi súıemeldeý ınjenerleri, IT jáne baǵdarlamalaý salasyndaǵy mamandar, sondaı-aq joǵary tehnologııaly kompanııanyń jumysy úshin qajet basqa da mamandar kiretin bolady, — dep habarlady basqarmadan.

Eske salaıyq, Almatynyń jańa ákimi Darhan Satybaldy josparymen bólisti. Shahar basshysy aıtyp ótken basym baǵyttardyń ishinde kólik júıesin damytý jáne ekologııany jaqsartý máseleleri bar.