Almatyda kepteliske qarsy jańa jol tańbalary paıda boldy

ALMATY. KAZINFORM – Almatyda kólik qozǵalysyn retke keltirý jáne keptelisterdiń aldyn alý maqsatynda birneshe jol qıylysyna jańa jol tańbasy – «vafelnıtsa» syzyldy.

Almaty polıtsııa departamentiniń málimetinshe, bul tańba Abaı – Nazarbaev, Abaı – Momyshuly jáne Tóle bı – Rozybakıev kósheleriniń qıylystarynda paıda bolǵan.

«Vafeldi» tańbanyń maqsaty – júrgizýshilerge qıylys bos bolmasa, oǵan kirýge bolmaıtynyn eskertý. Ol Qazaqstan Respýblıkasynyń jol qozǵalysy qaǵıdalarynda kózdelgen jáne kólik aǵynyn tıimdi basqarýǵa baǵyttalǵan.

– Bul shara jıi kezdesetin jasandy keptelisterdiń sanyn azaıtýǵa baǵyttalǵan. Mundaı jaǵdaılar kóbinese júrgizýshilerdiń bos emes qıylysqa shyǵýynan týyndaıdy. Jańa tańba kólik qozǵalysyn retke keltirip, jol qaýipsizdigin arttyrýǵa kómektesedi, - dedi Almaty polıtsııa departamenti Ákimshilik polıtsııa basqarmasynyń bastyǵy Ashat Qulbaev.

Eske salaıyq, buǵan deıin Almaty ákimdigi joldaǵy keptelisti azaıtý úshin birneshe sharany qolǵa alǵan edi. Sonyń ishinde jumys ýaqytynyń kestesin ózgertý jáne keıbir qyzmetkerlerdi qashyqtan jumysqa kóshirý bar.