Almatyda kenemen kúreske 144 mln teńge bólindi

ALMATY. KAZINFORM — Almatyda halyqty kene entsefalıtinen qorǵaýǵa baǵyttalǵan kenege qarsy aýqymdy sharalar júrip jatyr.

Bul týraly qalalyq dezınfektsııa ortalyǵynyń dırektory Aınur Aqqoshqarova óńirlik kommýnıkatsııalar qyzmetinde ótken baspasóz máslıhatynda aıtty.

Spıkerdiń sózinshe, Almatyda ormandy alqap pen qala saıabaqtarynda, skverlerinde kenelerge qarsy dezınfektsııalyq óńdeý jumystarynyń 1 kezeńi bastaldy. Jalpy óńdeletin aýmaq 4 733,12 gektar. Bul is-sharalarǵa 144 152 000 teńge bólindi, birinshi kezeńge 72 mln teńge jumsalady.

— Bıyl jańa «Tsıpertrın» preparaty qoldanylatyn bolady. Preparat gektaryna 0,75 lıtr tutyný normasymen 3 579,6 lıtr kóleminde satyp alyndy. Kenelerdiń táýeldiligin boldyrmaý úshin quraldar jyl saıyn jańartylyp otyrady. Mysaly, 2023 jyly «Favorıt V.K. E.», 2024 jyly «Delteks» qoldanyldy, — deıdi ol.

Aıtýynsha, jumystar arnaıy daıyndyqtan ótken dezınstrýktorlar men dezınfektorlar tarapynan júrgizilip jatyr. Barlyq maman turaqty túrde nusqaýlyqtan ótip, qajetti jabdyqtarmen tolyq qamtamasyz etilgen.

— Qazir ortalyqtyń qaramaǵynda ystyq jáne sýyq tuman termogeneratorlarymen, gıdropýlttermen, «Fazenda» búrikkishterimen, sondaı-aq avtokóliktermen jabdyqtalǵan eki mobıldi brıgada bar. 2025 jyly úsh jańa jabdyq jáne 5 myńnan astam jeke qorǵanys quraldary satyp alyndy, — dep atap ótti Aınur Aqqoshqarova.

Osyǵan deıin ShQO-da keneden zardap shekkender sany 80-ge jýyqtaǵany týraly jazǵanbyz.