Almatyda kenelerge qarsy dezınsektsııalyq óńdeý jumystary bastaldy
ALMATY. KAZINFORM – Almaty qalasynda kenelerge qarsy óndeý jumysynyń birinshi kezeńi bastaldy.
Almaty qalasy sanıtarııalyq-epıdemıologııalyq baqylaý departamenti basshysynyń orynbasary Ásel Qalyqovanyń aıtýynsha, 26 naýryzdan bastap megapolıstiń orman alqaptarynda, skver men saıabaqtarynda kenelerge qarsy dezınsektsııalyq óńdeý jumystary bastaldy. Jalpy kólemi – 2 366,56 ga bolady.
– Dezınsektsııalyq óńdeý bekitilgen kestege sáıkes jáne aýa-raıy jaǵdaılaryn eskere otyryp, jaýyn-shashyn bolmaǵan jaǵdaıda júrgiziledi. Aıtylǵan is-sharalar Ulttyq saraptama ortalyǵynyń Almaty qalasy boıynsha fılıalymen qalanyń sanıtarııalyq-epıdemıologııalyq qyzmet mamandarynyń tikeleı baqylaýymen júzege asyrylady. Qurylǵan dezınfektsııalyq brıgadalar qajetti jabdyqtarmen, kólik quraldarymen jáne jeke qorǵanysh quraldarymen tolyq qamtamasyz etilgen, - dedi ol.
Kenelerge qarsy óńdeý jumystaryn júrgizý úshin «Tsıpertrın» preparaty qoldanylady. Ásel Qalyqova preparat adamdar men janýarlardyń densaýlyǵy úshin qaýipsiz ekenin atap ótti. Sonymen qatar óńdeý júrgiziletin aımaqtarda «Kenelerge qarsy óńdeý júrgizilýde» degen jazýy bar aqparattyq taqtaıshalar ornatylady.
Qala turǵyndaryna saqtyq sharalaryn saqtaý usynyldy:
– kenelerge qarsy óńdeý júrgiziletin oryndarda preparat terige jáne kıimge tımeıtindeı jaqyndamaý;
– preparat tolyq kepkenge deıin úı janýarlaryn óńdelgen aýmaqqa shyǵarmaý;
– óńdelgen aýmaqta jıdekter men sańyraýqulaqtardy jınaýǵa óńdeýden keıin 40 kún ótken soń ruqsat etiledi.
Eske salaıyq, Túrkistan oblysynda 1 400-ge jýyq adamdy kene shaqqan.
