Almatyda kene shaqqandar sany artyp keledi

ASTANA. KAZINFORM — Almatyda naýryz aıynyń basynan 5 mamyrǵa deıin kene shaqqan 518 adam medıtsınalyq kómekke júgingen.

- Bul 2023 jyldyń sáıkes kezeńimen salystyrǵanda (579 adam) 10,5 paıyzǵa tómen. Kene shaqqan 14 jasqa deıingi balalardyń úlesi 53,4% (277 bala) qurady. Barlyǵyna der kezinde shuǵyl medıtsınalyq kómek kórsetilip, kórsetkishteri boıynsha kenege qarsy ımmýnoglobýlın engizildi. Jyl basynan beri kene ınfektsııasy tirkelgen joq, - deıdi qalalyq sanıtarlyq-epıdemıologııalyq baqylaý basqarmasynyń basshysy Qasymhan Alpysbaıuly.

Denege kene jabysqany anyqtalsa, múmkindiginshe tezirek (kene qadalǵannan keıin tórt kúnnen keshiktirmeı) bilikti medıtsınalyq kómek kórsetetin uıymdarǵa habarlasý jáne kene entsefalıtine qarsy ımmýnoglobýlın engizý qajet.

Kene shaqqannan zardap shekkenderge shuǵyl medıtsınalyq kómek qaladaǵy medıtsınalyq uıymdardyń kelesi travmatologııalyq pýnktterinde kórsetiledi:

Ortalyq qalalyq klınıkalyq aýrýhana (Jandosov kóshesi, 6);
Jedel járdem aýrýhanasy (Qazybek bı kóshesi, 96);
№ 4 qalalyq klınıkalyq aýrýhana (Papanın kóshesi, 220);
№ 7 qalalyq klınıkalyq aýrýhana (Qalqaman shaǵyn aýdany, 20);
Balalarǵa jedel medıtsınalyq kómek kórsetý ortalyǵy (Manas kóshesi, 40).

Sondaı-aq, keneler sanyn azaıtý jáne kene ınfektsııasynyń aldyn alý maqsatynda 1 sáýirden bastap qalanyń orman-toǵaı, saıabaq, alańqaılarynda kenege qarsy profılaktıkalyq sharalardyń birinshi kezeńi júrgizilýde.