Almatyda kene shaqqan jaǵdaıda qaıda júginý qajet
ALMATY. KAZINFORM – Almatyda turǵyndardy kene shaǵý derekteri kóbeıgen.
Qoǵamdyq densaýlyq saqtaý basqarmasynyń málimetinshe, kene shaqqannan keıin 96 saǵat ishinde mindetti túrde medıtsınalyq kómekke júginý qajet. Sebebi dál osy kezeńde kenege qarsy ımmýnoglobýlın engizý eń tıimdi nátıje beredi.
Almaty turǵyndary 1312 jelisine habarlasyp, kene shaǵý jáne oǵan qarsy vaktsınatsııa máselesi boıynsha keńes ala alady. Al keneni alyp tastaý jáne ımmýnoglobýlın engizý syndy shuǵyl kómek — qalalyq aýrýhanalardyń travmatologııa pýnktterinde kórsetiledi.
- Almaly jáne Bostandyq aýdandarynyń turǵyndary Jandosov kóshesi, 6 mekenjaıyndaǵy Ortalyq qalalyq klınıkalyq aýrýhanaǵa júgine alady.
- Túrksib jáne Jetisý aýdandarynyń turǵyndaryna Papanın kóshesi, 220 mekenjaıyndaǵy №4 qalalyq klınıkalyq aýrýhanada kómek kórsetiledi.
- Áýezov, Alataý jáne Naýryzbaı aýdandarynyń turǵyndaryn «Qalqaman» shaǵyn aýdany, 20 mekenjaıynda ornalasqan №7 qalalyq klınıkalyq aýrýhana qabyldaıdy.
- Medeý aýdanynyń turǵyndary Qazybek bı kóshesi, 96 mekenjaıyndaǵy Jedel shuǵyl kómek kórsetý aýrýhanasyna júginýge tıis.
Vedomstvo qala emhanalarynda 16 jastan asqan azamattarǵa arnalǵan «TıkoVak» vaktsınasy qoljetimdi ekenin atap ótti.
- 18 jasqa deıingi balalarǵa, turǵylyqty aýdanyna qaramastan, ımmýnoglobýlın engizýdi qosa alǵanda, shuǵyl profılaktıka Manas kóshesi, 40 mekenjaıyndaǵy Balalarǵa shuǵyl medıtsınalyq kómek kórsetý ortalyǵynda júrgiziledi. Kene entsefalıtiniń aldyn alýdyń eń senimdi joly — vaktsınatsııa. Ony Almaty qalasynyń emhanalarynda alýǵa bolady, - dep habarlady basqarmadan.
Eske salaıyq, buǵan deıin Densaýlyq saqtaý mınıstrligi Almaty óńirinde kene shaǵý órship turǵanyn habarlady.
