Almatyda kemirgishterge qarsy kóktemgi naýqan bastalady
ALMATY. KAZINFORM – Almatyda 2026 jyly 15 naýryz ben 30 sáýir aralyǵynda kóktemgi jappaı deratızatsııa júrgiziledi. Bul jumysty Almatynyń kommýnaldyq ınfraqurylym jáne turǵyn úı ınspektsııasy basqarmasy merdiger uıym – «Eko Servıs Almaty» JShS-men birlesip uıymdastyrady.
Qala ákimdiginiń málimetinshe, kóktemgi kezeń aıasynda jalpy aýdany 47 gektardan asatyn ortaq paıdalanylatyn aýmaqtar dárilenedi. Jumystar kemirgishterdiń negizgi mekendeıtin oryndarda: ashyq bıotoptarda, jasyl aımaqtarda, kemirgishterdiń inderinde, aryq jelilerinde, ózen men sý aıdyndarynyń jaǵalaýlarynda, sondaı-aq qoǵamdyq kólik aıaldamalary mańynda júrgiziledi.
Sonymen qatar jeke sektor turǵyndaryna qoldaný jónindegi tolyq nusqaýlyǵymen birge kemirgishterge arnalǵan ýly jem tegin taratylady.
Qalalyq qyzmetter «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksiniń 107-babyna sáıkes jeke jáne zańdy tulǵalar ózderine tıesili aýmaqtarda dezınfektsııa, dezınsektsııa jáne deratızatsııa jumystaryn óz betinshe júrgizýge mindetti ekenin eske saldy.
– Osyǵan sáıkes, jeke turǵyn úılerdiń, ǵımarattardyń jáne jer aýmaqtarynyń deratızatsııasyn olardyń ıeleri júrgizedi. Al kondomınıým nysandarynyń ortaq múlkin – jertólelerdi, shatyrlardy, baspaldaq alańdaryn jáne úı mańyndaǵy aýmaqtardy óńdeý MIB/PIK, sondaı-aq menshik ıeleri men jalǵa alýshylardyń qarajaty esebinen júzege asyrylady, - delingen habarlamada.
Qalalyq qyzmetter zańdy tulǵalardy, MIB/PIK-terdi ózderine qarasty ǵımarattarda, aýmaqtarda jáne qatty turmystyq qaldyqtarǵa arnalǵan konteıner alańdarynda deratızatsııa jumystaryn qalalyq jappaı óńdeý naýqanyna qatar uıymdastyrýǵa úndedi.
Eske salaıyq, buǵan deıin Almatyda tórt túlik maldy tegin vaktsınatsııalaý bastalǵanyn jazǵanbyz.
