Almatyda Kemel Toqaevtyń 100 jyldyǵyna arnalǵan halyqaralyq konferentsııa ótip jatyr
Almatyda qazaq ádebıetiniń kórnekti ókili, jazýshy, jýrnalıst Kemel Toqaevtyń 100 jyldyǵyna oraı «Qazaq detektıv janrynyń darabozy» atty halyqaralyq ǵylymı-tájirıbelik konferentsııa ótti, dep habarlaıdy QazAqparat tilshisi.
Alqaly jıynǵa Qazaqstan, Ózbekstan, Qyrǵyzstan, Reseı memleketteriniń shyǵarmashylyq zııaly qaýym ókilderi qatysty. Shara barysynda Mádenıet jáne aqparat mınıstri Aıda Balaeva Memleket basshysynyń quttyqtaý sózin oqyp berdi.
Konferentsııada elimizdegi detektıv janrynyń damýy men ereksheligi, «Qazaq detektıviniń atasy» atanǵan jazýshy Kemel Toqaevtyń ómiri men shyǵarmashylyǵyna qatysty derekter men tyń tujyrymdar talqylandy.
Sarapshy ǵalymdar Kemel Toqaev tek qazaq detektıv janrynyń ǵana emes, Ortalyq Azııa ádebıetinde osynaý biregeı janrdyń damýyna erekshe úles qosqan jazýshy ekenin atap ótti.
Qyrǵyzstan jazýshylar odaǵynyń tóraǵasy Nurlan Qalybekov, Qyrǵyzstanda Kemel Toqaevtyń mýzeıin ashýdy usyndy.
«Otyzynshy jyldardaǵy qazaq pen qyrǵyzdyń basynan ótken qıyn taǵdyrdy sol mýzeı aıasynda kópshilikke tanystyrýǵa bolar edi», - dedi Nurlan Qalybekov.
"Manavııat va marıfat» respýblıkalyq ortalyǵynyń jetekshisi, Ózbekstan Jazýshylar Odaǵynyń múshesi Mınhojıddın Hodjımatov qazir Ózbekstanda qazaq ádebıeti klassıkteriniń shyǵarmalaryn aýdarý isi qarqyn alǵanyn, Kemel Toqaevtiń 100 jyldyǵy qazaqqa ǵana emes, ózbekke de ortaq mereke ekenin jetkizdi. Sondaı-aq, ózbek tilinde aýdarylǵan Kemel Toqaevtyń kitabyn Qazaqstan Jazýshylar odaǵyna syılady.
Konferentsııa aıasynda «Qazaq detektıv janrynyń negizin qalaýshy», «Otan úshin ot keshý», «Jýrnalıst – qoǵamnyń aınasy, qulaǵy hám tili» atty taqyryptyq sektsııalar uıymdastyryldy.
Konferentsııa qorytyndysy boıynsha spıkerler men sarapshylardyń baıandamalary arnaıy jınaqqa basylyp shyǵady.
