Almatyda kelesi jyly 13,2 myń nysan seısmıkalyq qaýipsizdikke tekseriledi
Almaty qalasynyń ákimi Erbolat Dosaev Almatyda bıik ǵımarattar qurylysynyń seısmıkalyq qaýipsizdigi qalaı baqylanatynyn aıtyp berdi, dep habarlaıdy Kazinform.
«Almatyda seısmıka taqyryby – mańyzdy máselelerdiń biri. 2017-2018 jyldary birinshi seısmokarta jasaldy jáne tehnologııalyq aqaýlar men aımaqtarǵa baılanysty 10 ball boljanatyn jańa ýchaskeler anyqtaldy. Sondyqtan bizde mundaı aımaqtardaǵy qurylys zań boıynsha qatań shektelgen jáne QazQSǴZI-dan arnaıy tehnıkalyq sharttar alý qajet. Sonymen qatar depýtattar osy normalardy kúsheıtý boıynsha bizdi qoldady. 2016 jyldan keıin zańnamany yryqtandyrý sheńberinde tapsyrys berýshi, qurylys salýshy men avtorlyq tehnıkalyq qadaǵalaýshylar obektilerdi ózderi qabyldaıtyndaı etip jasaldy. Usynylǵan jańa zańnamada qala qurylysyn baqylaý basqarmasy da qatysady jáne kúrdeli tehnıkalyq obektiler boıynsha QazQSǴZI qosylady, ol munyń bári durys salynǵanyn rastaıdy», - dedi E. Dosaev Ortalyq kommýnıkatsııalar qyzmetinde ótken baspasóz brıfınginde.
Seısmıkalyq qaýipsizdikti kúsheıtý úshin bıylǵy qazan aıynda qalanyń 16,7 myń ǵımaratyna seısmıkalyq aýdıt bastaldy.
2023 jyly 3,5 myń obektige aýdıt jasalady, qalǵan 13,2 myń obektini 2024 jyldyń sońyna deıin tekserý josparlanǵan.
«Osydan keıin qajetti sharalardy qabyldaı bastaımyz. Eń bastysy – barlyq tehnologııalyq aqaýlarda turǵyn úısiz qoǵamdyq keńistikter jasaýǵa tyrysamyz. Almatynyń 2040 jylǵa deıingi jańa bas josparynda bul normalar kózdelgen. Biz bul boıynsha qatań shekteýler qoıdyq jáne ǵımarat qabatyn aıtarlyqtaı tómendettik. QazQSǴZI talaptary boıynsha 10 baldyq aımaqta arnaıy tehnıkalyq sharttardy alyp, 6 qabatqa deıin ǵana salýǵa bolady. Aqaýlar aımaǵynda da dál solaı. Sondyqtan biz bul normalardy egjeı-tegjeıli josparlaýdy túzetý kezinde eskerdik. Kóptegen qurylys salýshylar, qurylys kompanııalary óz jobalaryn ózgertip, qabat sanyn aıtarlyqtaı tómendetýde. Sebebi bul olardyń qaýipsizdigin qamtamasyz etedi. Biz Almaty úshin seısmıkalyq qaýipsizdiktiń qanshalyqty mańyzdy ekenin túsinemiz. Erekshe mártebe jáne basqa da zańdar týraly zańda bul norma Almaty úshin arnaıy engiziledi», - dep túsindirdi ákim.
Sondaı-aq Erbolat Dosaev bul turǵyn úı baǵasyna áser etýi múmkin ekenin, biraq asa kóp mólsherde emestigin jetkizdi.
