Almatyda QazUAÝ aýmaǵyndaǵy turǵyn úı qurylysyna qatysty daý sheshilmeı otyr
ALMATY. KAZINFORM — Almatydaǵy Qazaq ulttyq agrarlyq zertteý ýnıversıtetiniń aýmaǵynda turǵyn úı kesheni salynbaq. Bul stýdentter men oqytýshylar arasynda alańdaýshylyq týdyryp otyr.
Joǵary oqý ornynyń oqytýshylary Májilis depýtaty Erlan Saırovqa resmı hat joldap, máseleni sheshýge kómek suraǵan. Olar ýnıversıtet balansynan zańsyz shyǵarylǵan birqatar nysandy qaıtaryp berýdi talap etip otyr. Bul — zerthanalyq korpýstar, jataqhanalar, oqý ǵımarattary, sondaı-aq stýdentter qalashyǵynyń dál ortasynda ornalasqan 96 sotyq jer telimi.
Ýnıversıtet ókilderiniń aıtýynsha, bul aýmaqta qurylys kompanııasy birneshe kópqabatty turǵyn úı salýdy josparlap otyr.
Qurylys jumystary bir kezderi bastalǵanymen, keıin toqtatylǵan. Qazir sol jerde stýdentter men ýnıversıtet qyzmetkerleriniń ómirine qaýip tóndiretin úlken shuńqyr bar.
Máseleniń mán-jaıyn anyqtaý úshin atalǵan mekenjaıǵa Májilis depýtaty Erlan Saırov, qala ákimdiginiń ókilderi, ýnıversıtet basshylyǵy, BAQ jáne tıisti sala mamandary keldi.
— Biz bul máseleni eki jyldan beri kóterip kelemiz, biraq prokýratýra da, Ónerkásip jáne qurylys mınıstrligi de, jer resýrstaryn basqarý komıteti de naqty shara qabyldamaı otyr. Bul — Prezıdenttiń zańdylyq pen tártipti qalpyna keltirý saıasatyna ashyq sabotaj dep esepteımin. Buǵan deıin burynǵy qala ákimine birneshe ret aıttym, biraq esh nátıje bolmady. Endi jańa ákim Darhan Satybaldy myrzanyń kelýimen másele sheshiledi dep úmittenemiz. Áıtpese, Prezıdentke tikeleı júginýden basqa amal qalmaıdy, — dedi depýtat.
Onyń aıtýynsha, stýdentter qalashyǵy aýmaǵynda turǵyn úı keshenin salý Almaty qalasynyń qoldanystaǵy bas josparyna qaıshy keledi. Sebebi bul jer oqý oryndarynyń fýnktsıonaldyq aımaǵyna jatady.
— Qazir munda topyraq kóship jatyr, bul stýdentterdiń ómiri men densaýlyǵyna tikeleı qaýip tóndirip otyr. Munda tehnogendik apat bolýy múmkin, — dep qosty ol.
Óz kezeginde Almaty qalasy ákiminiń orynbasary Beıbit Shahanov qurylys jumystarynyń zańsyz ekeni jóninde resmı sheshimniń ázirge joq ekenin málimdedi. Biraq ákimdik óz quzyreti aıasynda zań sheńberinde áreket etetinin jetkizdi.
Onyń sózinshe, qurylys ýaqytsha toqtatyldy. Shuńqyr jabylyp, qorshaý alynyp tastalady. Bul jumystardy qurylys salýshy oryndaıdy — sot sheshiminen keıin jumystyń jalǵasatyn-jalǵaspaıtyny belgili bolady.
Qurylysqa ruqsat berý zańdylyǵy máselesi ashyq kúıinde qalyp otyr.
Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Serik Nábıev qurylys jumystary qoǵamdaǵy áleýmettik shıeleniske baılanysty toqtatylǵanyn atap ótti. Jaqyn arada ýákiletti organdar men qurylys salýshyǵa qatysty quqyqtyq baǵa beriledi.
Almatyda qalalyq josparlaý jáne ýrbanıstıka basqarmasy basshysy Nurlan Boranbaev bul jer ýchaskesi eski josparlaý jobasy boıynsha turǵyn úı qurylysyna zańsyz aýystyrylǵanyn túsindirdi.
Almaty qalasynyń 2023 jyly bekitilgen jańa bas jospary men jańa egjeı-tegjeıli josparlaýyna sáıkes bul aýmaq — oqý aımaǵy. Munda turǵyn úıler emes, jataqhana, ákimshilik ǵımarattar salýǵa bolady.
— Biz qurylysty toqtatyp, aldyn ala berilgen ruqsat qujattaryn keri qaıtara alamyz. Jobalanǵan nysannyń fýnktsıonaldyq maqsatyn jer teliminiń fýnktsıonaldyq maqsatyna sáıkes ózgertýge bolady, — dedi Nurlan Boranbaev.
Stýdentter de Alma Mater-di qorǵaýǵa tyrysty. Úshinshi kýrs stýdenti Nurıslam Ádilbektiń aıtýynsha, bul másele buǵan deıin de birneshe ret kóterilgen, biraq naqty nátıje joq.
Onyń aıtýynsha, jyl saıyn stýdentter sany artyp keledi, al ýnıversıtettiń ınfraqurylymy jańartýdy jáne keńeıtýdi qajet etedi. Bul aýmaqqa turǵyn úı emes, jańa aýdıtorııalar, zerthanalar men jataqhanalar qajet.
QazUAZÝ rektorynyń orynbasary Qýat Sultanǵazıevtiń aıtýynsha, 2000-jyldardyń basynan beri ýnıversıtet ondaǵan nysannan aıyrylǵan: Seıfýllın men Abaı dańǵyldaryndaǵy ǵımarattar, Naýryzbaı batyr kóshesindegi stadıon, sheberhanalar, zerthanalar, endi stýdentter qalashyǵy da qaýip tónip tur.
Onyń sózinshe, stýdentter qalashyǵynyń dál ortasynda ornalasqan 96 sotyq jerde bes kópqabatty turǵyn úı salý josparlanyp otyrǵany — úlken másele.
— Qazir biz osy jerdi ózimizge qaıtarýǵa tyrysyp jatyrmyz. Munda qazylǵan shuńqyr bar, endi bes kóppáterli úı salmaqshy. Elestetip kórińizshi, ýnıversıtettiń ortasynda turǵyn úı kesheni. Keıin ol jaqtaǵy turǵyndar qaıda shyǵady, ıtterin qaıda serýendetedi? Biz olarǵa ýnıversıtet aýmaǵynda júrýge ruqsat bermeımiz. Stýdentter júrgen jerde otbasyly adamdar qalaı tynyǵady? Suraq kóp. Munda buryn sheberhanalar, garajdar, iri ǵylymı-zertteý zerthanalary bolǵan, bárin súrip tastady, — deıdi ol.
Ákimdik ókilderi qurylys jumystarynyń zańdylyǵyna qatysty tekserýdi osy apta sońyna deıin aıaqtaýǵa ýáde berdi.
Eske salaıyq, 2023 jyly Qazaq ulttyq agrarlyq zertteý ýnıversıtetiniń ǵalymdary oqý ornynyń esebinen shyǵarylǵan aktıvterdi qaıtarý máselesin kótergen edi.
Sondaı-aq Almaty qalasynyń prokýratýrasy Qazaq ulttyq agrarlyq zertteý ýnıversıtetin tekserý qorytyndysy boıynsha jalǵan tuqym sebý jáne egis alqaptaryn óńdeý arqyly bıýdjet qarajatyn urlaý faktilerin anyqtaǵan bolatyn.Kelgen shyǵyn — 43,8 mln teńge.