Almatyda qazaqtyń tuńǵysh operasy «Qyz Jibek» sahnalandy
ALMATY. KAZINFORM – Abaı atyndaǵy Qazaq ulttyq opera jáne balet teatry Qazaqstandaǵy klassıkalyq ónerdiń negizin qalaǵan Evgenıı Brýsılovskıı, Qanabek Baıseıitov, Qurmanbek Jandarbekov syndy kórnekti tulǵalardyń 120 jyldyǵyna arnalǵan «Qyz Jibek» operasyn usyndy. Bul týraly Mádenıet jáne aqparat mınıstrligi málim etti.
Bul tulǵalardyń esimderi ulttyq mýzyka men teatr óneriniń tarıhynda altyn áriptermen jazylǵan. Kesh barysynda «Qyz Jibek» operasynyń alǵashqy jáne myńynshy qoıylymynan sırek kezdesetin tarıhı kadrlar kórsetildi. Teatr zalynda sol ańyz adamdardyń daýysy estildi. Keıin olardyń isin jalǵap kele jatqan izbasarlary da sóz sóıledi.
Aıta keteıik, qazaqtyń tuńǵysh operasy «Qyz Jibek» 1934 jyldyń 7 qarashasynda sahnalandy. Sol qoıylymda basty partııalardy Kúlásh Baıseıitova, Qurmanbek Jandarbekov jáne Qanabek Baıseıitov oryndady. Olar spektaklge qatysyp qana qoımaı, E.Brýsılovskııge qazaq mýzykasyn meńgerýge kómektesip, operanyń negizi bolǵan mýzykalyq materıaldy tańdaýǵa yqpal etti.
Opera mýzykasy túgeldeı folklorǵa negizdelgen. Onda elýden astam kúı men án qamtylyp, halyq mýzykasy men poezııasynyń ozyq úlgileri jınaqtalǵan. Qoıylym kópshiliktiń kóńilinen shyqty. Keshke mereıtoı ıeleriniń týystary da qatysty. Ulttyq opera óneriniń tarıhı jáne zamanaýı murasy shyrqalyp, qoıylym barsha kórermenge erekshe áser qaldyrdy.
Aıta keteıik, Qyz Jibek beınesin somdaǵan Merýert Ótekeshova BQO-nyń qurmetti azamaty atandy.