Almaty jurty «qazaqtyń Bekejanyn» aqtyq saparǵa shyǵaryp saldy
ALMATY. KAZINFORM — Búgin, 23 jeltoqsanda kórnekti akter, rejısser, Qazaq KSR jáne KSRO halyq ártisi Asanáli Áshimovpen qoshtasý rásimi ótti.
Halyq ártisi Abaı atyndaǵy qazaq ulttyq opera jáne balet teatrynan sońǵy saparǵa attandy.
Jıynda Memlekettik keńesshi Erlan Qarın Prezıdent Qasym-Jomart Toqaevtyń kóńil aıtý jedelhatyn oqydy.
— Asanáli Áshimov búkil sanaly ǵumyryn teatr jáne kıno salasyna arnap, tól mádenıetimizdiń kókjıegin keńeıtýge ólsheýsiz úles qosty. Ol kóptegen obrazdy sheber somdap, kórermen qaýymnyń ystyq yqylasyna bólendi. Sahna sańlaǵy ári kásibı kınoger retinde sońyna óshpes iz qaldyrdy. Jas ónerpazdarǵa baǵyt-baǵdar berip, rýhanı sabaqtastyqtyń saqtalýyna zor eńbek sińirdi. Óreli ónerdiń týyn bıik ustap, ónegeli ǵumyr keshken Asanáli Áshimovtiń jarqyn beınesi halqymyzdyń júreginde saqtalady. Imany salamat, jany jannatta bolsyn!, — delingen jedelhatta.
Qoshtasý rásiminde Erlan Qarın Halyq ártisimen sońǵy kezdesýin eske aldy.
— Týra bir apta buryn Prezıdent Almatyǵa is saparmen barǵanyńda Asanáli aǵamen jolyǵyp, sálemimdi jetkizersiń degen edi. Aldyńǵy aptada jumystarymmen Almatyǵa kelgenimde Asanáli aǵamyzben kezdesýge ýádelesken bolatynbyz. Jarty saǵat emes, bir saǵattyń ózi azdaý bolar dep, jumystarymdy erte bitirdim. Asyqpaı, keń otyryp áńgimeleseıik dep, túski ýaqytta kezdestik. Qasyna serik bolsyn dep, Júrsin Erman aǵamyzdy, aqyn Qalqaman Sarındi jáne kıno salasynda júrgen birqatar jastardy da qosa shaqyrdym. Áńgimemiz úsh saǵatqa sozyldy. Asanáli aǵamyz ádettegideı estelikterin aıtty. Sol kúni bir ashylyp sóıledi. Ketkisi kelmegendeı bolyp kórindi. Asyqpady. Qoshtasatyn sátte «Aǵa, endi Almatyǵa Jańa jyldan keıin ǵana kelermin, sonda taǵy bir jolyǵarmyz» dep edim, aǵamyz «Biz kezinde jyl sanap edik, keıin aı sanadyq. Qazir kún sanaıtyn jastamyz» dep jaýap berdi. Átteń, sol kúni sońǵy kezdesýimiz ekenin bilmedim, biraq Prezıdentimizdiń sálemin jetkizip úlgerdim, — dedi ol.
Qarın sonymen birge Asanáli Áshimovtiń qıyn da qıly taǵdyry týraly aıtty.
— Asanáli aǵamyz uly ónerdiń ańyzy, ult rýhanııatynyń abyzy edi. 20 jasynda teatr sahnasynda jarqyrady. 30-ynda kınonyń jaryq juldyzyna aınaldy. 40-qa jetpeı KSRO-nyń Halyq ártisi ataǵyn ıelendi. Teatrda talaı bas rólderdi somdady. Kınodaǵy obrazdary qanshama. Rejısserlik qyry bir bólek. Ustazdyq etti, shákirt tárbıeledi. Qoǵamdyq ómirden tys qalmady. Kitap jazdy, kúndelik júrgizdi. Ónerdegi joly jarqyn bolsa da, ómirdegi joly qıyn boldy. Biraq taǵdyrǵa ókpesin aıtqan emes. Ózi ustazdaryn, aralasqan aǵalaryn — Ǵabıt Músirepovti, Sháken Aımanovty, Sultan Qojyqovty, Káýken Kenjetaevty únemi aıtyp otyrýshy edi. Sol kisilerdiń esimin qaıta jańǵyrtsaq eken, jastar kóp bilse eken dep otyratyn. Asanáli aǵamyz ózine osyndaı bir mıssııa arqalap júrdi, — dedi Erlan Qarın.
Qaraly jıynǵa qatysqan Almaty ákimi Darhan Satybaldy Asanáli Áshimovpen birneshe sharada kezdeskenin jáne oryndalmaı qalǵan oı-nıeti týraly da aıtty.
— 90 jyldyq mereıtoıyn Almaty boıynsha ǵana emes, búkil Qazaqstan kóleminde mádenı merekege aınaldyramyz degen josparymyz bolǵan edi. Ókinishke qaraı, Allanyń jospary basqa eken. Amal qansha, — dedi qala ákimi.
Al kıno jáne teatr akteri Bolat Ábdilmanovtyń sózinshe, Asanáli Áshimovtiń qazasymen birge tutas bir dáýir kóshkendeı boldy.
— Biraq biz osyndaı dana halqy, artynan ergen talantty izbasarlary barda Asekeńniń óneriniń shań baspaıtynyna, kótergen týynyń jyǵylmaıtynyna nyq senimdimiz. Shyn máninde Asekeń baqytty ǵumyr keshti. Halqyn qanshalyq súıse, sonshalyqty adal qyzmet etti. Halqy da Asekeńdi aıalady, alaqanyna saldy, tóbesine kóterdi, — dedi ol.
Marqumnyń jesiriniń joqtaýy jınalǵan jurttyń júregin shymyrlatyp, qabyrǵasyn odan ári qaıystyrdy.
Qoshtasý rásimine mádenıet jáne óner salasynyń ókilderi, qoǵam qaıratkerleri, marqumnyń áriptesteri, shákirtteri jáne qala turǵyndary kóptep jınaldy.
Aıta keteıik, Halyq ártisi «Keńsaı-1» zıratyna jerlenedi.
Eske salaıyq, Asanáli Áshimov 21 jeltoqsan kúni 89 jasqa qaraǵan shaǵynda ómirden ótti. Ol qazaq kınosy men teatrynyń altyn qoryna engen ondaǵan róldi somdap, birneshe býyn akterdiń qalyptasýyna úles qosty.