Almatyda Qazaqstannyń úzdik fınteh-startaptary anyqtaldy

Bul pıtch-sessııa barysynda Qazaqstannyń fınteh-startaptary óz jobalaryn ınvestorlarǵa, bankterge, tehnologııalyq kompanııalarǵa jáne halyqaralyq sarapshylarǵa tanystyrdy.

Fintech Stars Battle 2026 baıqaýynyń bas júldegeri jáne White Hill Capital kompanııasynan SAFE sharty boıynsha $100 000-ǵa deıin ınvestıtsııa ıelengen joba – SHART RATE. Bul qaýipsiz onlaın mámileler jasaýǵa arnalǵan tsıfrlyq platforma. Ol jeke tulǵalar men bızneske birneshe mınýt ishinde zańdy kúshi bar sharttar jasasýǵa jáne shart talaptary buzylǵan jaǵdaıda sot sheshimin jedel alýǵa múmkindik beredi.

Basqa fınalıster de seriktesterden mańyzdy júldelerge ıe boldy. BEHYPE jobasy (CEO – Aıgerim Beısembına) ınflıýenser-marketıng platformasy men blogerlerge arnalǵan fınteh-kartany damytyp jatyr. Joba Tumar Innovation Hub uıymdastyratyn Dýbaıdaǵy akseleratsııalyq baǵdarlamaǵa qatysý múmkindigin jeńip aldy. BYTRADER startapy (CEO – Mýslım Abdýllaev) AI quraldary men táýekelderdi basqarý fýnktsııalary bar saýda termınalyn usynyp, Yandex Cloud kompanııasynan 6 mln teńge kóleminde grant aldy.

Fınalda taǵy úsh myqty joba óz sheshimderin tanystyrdy: PAIDAX – $1-den bastap ınvestıtsııalaýǵa múmkindik beretin mobıldi áleýmettik ınvestıtsııalaý platformasy; ENKI – qurylys obektisin tólemdi iske qosatyn trıgger retinde verıfıkatsııalaý júıesi; FAQTOR – shaǵyn jáne orta bıznesti kredıtteýge arnalǵan AI-native qarjylyq platforma.

-Bizdiń jahandyq mıssııamyz – eki taraptyń da quqyqtyq turǵydan qorǵalýyn qamtamasyz etetin ádil mámileler jasaýǵa arnalǵan aýqymdy ekojúıe qurý. Qazirdiń ózinde biz bıznes suranysyna sáıkes sharttardy avtomatty túrde generatsııalaý úshin Shart AI neırondyq jelisin engizip jatyrmyz. Jeńip alǵan júlde qory tek ónim men komandany damytýǵa ǵana emes, sonymen qatar bizdiń basty maqsatymyzǵa – «aýyzsha ýaǵdalastyqtar» mádenıetin ózgertýge baǵyttalady. Biz qoǵamdy óz mindettemelerin ashyq ári naqty túrde bekitýge daǵdylandyryp, bul qarjylyq resýrstardy da, adam arasyndaǵy qarym-qatynasty da saqtaýǵa kómektesedi dep senemiz», – dedi SHART RATE negizin qalaýshy ári bas dırektory Temir Aden josparlarymen bólisip.

-White Hill Capital úshin Fintech Stars Battle baıqaýyna qatysý demeýshilik emes, tolyqqandy ınvestıtsııalyq jumys boldy: biz fınalısterdi ınvestıtsııalyq paıplaındaǵy kez kelgen basqa mámilege qaraǵandaı baǵaladyq. SHART RATE naryqtaǵy naqty máseleni túsinýi, jumys istep turǵan ónimi jáne ıdeıany naqty zańdyq ári qarjylyq nátıjege deıin jetkize alatynyn dáleldegen komandasymen erekshelendi. SAFE boıynsha $100 000-ǵa deıingi ınvestıtsııa – alǵashqy qadam. Biz komandamen birge ónimdi, ıýnıt-ekonomıkany jáne óńirdiń jańa naryqtaryna shyǵý múmkindigin damytý baǵytynda jumys isteıtin bolamyz. Sondaı-aq barlyq fınalısterdiń jalpy deńgeıin atap ótkim keledi: jobalardyń jartysy búginde ınstıtýtsıonaldyq ınvestorlarmen kelissóz júrgizýge tolyq daıyn, birneshe komandamen sammıtten keıin de baılanysty jalǵastyramyz», – dep túsindirdi White Hill Capital kompanııasynyń ınvestıtsııalar jónindegi bas dırektory (Chief Investment Officer) Nargıza An.

Fınalǵa 50-den astam ótinimniń ishinen iriktelgen 6 startap shyqty. Pıtch-sessııa qatań ýaqyt sheńberinde ótti: ár fınalıstke tanystyrylym úshin 4 mınýt jáne qazylar alqasynyń suraqtaryna jaýap berý úshin 3 mınýt berildi. Sessııa moderatory Saıd Maksımov boldy.

Bıyl Battle qazylar alqasy jobalardy bes negizgi krıterıı boıynsha baǵalady: másele jáne naryq, ónim jáne tehnologııa, bıznes-model, komanda, sondaı-aq pıtchtiń sapasy.

Qazylar alqasynyń quramyna naryqtyń tanylǵan sarapshylary kirdi:

Daýlet Batyrbek, Prometei startapynyń CEO-sy;

Rýslan Ensebaev, bcc-hub tehnologııalyq kompanııasynyń CEO-sy (Bank TsentrKredıttiń enshiles kompanııasy);

Tımýr Shalekenov, Yandex Qazaqstan CEO-sy;

Narıman Mýkýshev, Halyk Bank Basqarma tóraǵasynyń orynbasary (tsıfrlyq baǵytqa jetekshilik etedi);

Aıda Dýssova, Almaty Hub dırektory;

Dıas Mýhamedıev, Mycar Group kompanııasynyń Deputy CEO-sy (ekojúıeniń tsıfrlyq ónimderine jaýapty).

-Tanystyrylǵan jobalardyń basym bóligi – qazirdiń ózinde kúshti trekshny bar jumys istep turǵan bıznes. Keıbireýleri aı saıyn kórsetkishterin eki esege arttyratyn áserli ósimdi kórsetip otyr. Startaptardyń keminde úshten biri naryqtyń asa ózekti máselelerin sheshýge baǵyttalǵan, al olardyń komandalary joǵary deńgeıdegi daıyndyqpen jáne iske degen belsendiligimen erekshelenedi. Osyndaı tásil saqtalǵan jaǵdaıda, bul kompanııalardy tek jergilikti naryqta ǵana emes, shetelde de úlken bolashaq kútip tur dep senemin. Bizdiń tehnologııalyq ónimderimizdi aýqymdy túrde damytýǵa jáne eksporttaýǵa zor áleýet bar, – dedi qazylar alqasynyń múshesi, Halyk Bank Basqarma tóraǵasynyń orynbasary Narıman Muqyshev.

-Bul baıqaý aıasyndaǵy negizgi mindetimiz – komandalarǵa naryqtyń jetekshi oıynshylarynan kapıtal men beıindi saraptamaǵa tikeleı qoljetimdilik berý. Pıtch-sessııa nátıjeleri óńirde suranysqa ıe ári qaýipsiz qarjylyq tehnologııalardy ázirleýge qabiletti myqty komandalar bar ekenin kórsetti, – dep qorytyndylady Kazakhstan Fintech Network bas dırektory Dıas Savetqanov.

Aıta keteıik, Fintech Stars Battle – jyl saıyn Qazaqstannyń bank sektoryndaǵy basshylaryn, fınteh-kompanııalardy, memlekettik qurylymdar men qarjy naryǵynyń sarapshylaryn biriktiretin CAFS 2026 iskerlik baǵdarlamasynyń bir bóligi.

Osyǵan deıin Almatyda aýqymdy Central Asia Fintech Summit 2026 ótkeni týraly jazdyq.