Almatyda Qazaqstannyń Kýrorttyq keńesi quryldy
ASTANA. KAZINFORM — Almatyda memlekettik organdardyń, ǵylymı jáne medıtsınalyq qoǵamdastyqtyń, sanatorıılik-kýrorttyq uıymdardyń ókilderi men halyqaralyq sarapshylardyń qatysýymen «Shıpajaı-2026» XI halyqaralyq ǵylymı-praktıkalyq forýmy ótti.
Densaýlyq saqtaý mınıstrliginiń málimetinshe, forýmnyń basty nátıjesi — Qazaqstan Respýblıkasynyń Kýrorttyq keńesin qurý týraly sheshimniń qabyldanýy. Bul sheshim is-sharanyń qararynda bekitildi.
Kýrorttyq keńes memlekettik organdar, ǵylym jáne praktıkalyq densaýlyq saqtaý ókilderin biriktiretin alańǵa aınalady. Onyń aıasynda sanatorıılik-kýrorttyq salany damytý, memlekettik saıasatty jetildirý jáne medıtsınalyq ońaltýǵa zamanaýı tásilderdi engizý boıynsha júıeli usynystar ázirlenedi.
Forým jumysyna Densaýlyq saqtaý mınıstri Aqmaral Álnazarova qatysty. Ol sanatorıılik-kýrorttyq saýyqtyrýdyń qazirgi densaýlyq saqtaý júıesi men medıtsınalyq týrızmdi damytýdaǵy mańyzy artyp kele jatqanyn atap ótti.
— Búginde sanatorıılik-kýrorttyq saýyqtyrý medıtsınalyq týrızmdi transformatsııalap, dástúrli emdeýdi joǵary tehnologııalyq medıtsınamen, Check-up formatyndaǵy jekelendirilgen baǵdarlamalarmen, zamanaýı dıagnostıkamen jáne tsıfrlyq sheshimdermen biriktirip jatyr, — dedi mınıstr.
Forým barysynda mamandar kýrortologııa men medıtsınalyq ońaltýdyń zamanaýı tehnologııalaryn, densaýlyq saqtaýdaǵy tsıfrlyq sheshimderdi, sanatorıılik-kýrorttyq emdeýdi damytý, kadrlar daıarlaý jáne halyqaralyq yntymaqtastyq máselelerin talqylady.
Sondaı-aq qalpyna keltirý eminiń ınnovatsııalyq ádisterin engizýge jáne sanatorıılik-kýrorttyq salanyń medıtsınalyq ońaltý júıesiniń bir bóligi retindegi múmkindikterin keńeıtýge erekshe nazar aýdaryldy.
Forýmǵa Qazaqstan, Qytaı, Sıngapýr, Túrkııa, Ázerbaıjan, Tájikstan, Reseı, Belarýs, Ózbekstan, Qyrǵyzstan, Eýropa elderi men AQSh-tan mamandar qatysty.
Eske salaıyq, buǵan deıin ınvataksı men shıpajaı qyzmetteriniń shyǵynyn óteý tártibi ózgergenin jazǵanbyz.
