Almatyda Qazaqstan–Italııa saýda úıi ashylady
ASTANA. KAZINFORM — 2026 jyldyń 20 aqpanynda jergilikti ýaqyt boıynsha saǵat 15:00–de Almaty qalasynda Qazaqstan–Italııa saýda úıiniń resmı ashylýy ótedi, dep habarlaıdy Saýda jáne ıntegratsııa mınıstrliginiń baspasóz qyzmeti.
Bul jańa alań Qazaqstan Respýblıkasy men Italııa Respýblıkasy arasyndaǵy saýda-ekonomıkalyq jáne ınvestıtsııalyq yntymaqtastyqty damytýǵa arnalǵan ınstıtýtsıonaldyq platforma bolmaq.
Saýda úıi Almaty qalasy, Naýryzbaı batyr kóshesi, 17A (Almaty Plaza) mekenjaıynda ornalasqan. Ol Almaty, Mılan jáne Atyraý qalalarynda jumys istep turǵan keńselerdi biriktiretin Italııa-Qazaqstan saýda qaýymdastyǵynyń (ACIK) jańa iskerlik alańy bolady.
Joba eki el arasyndaǵy ekonomıkalyq áriptestikti nyǵaıtyp, bıznesti qoldaýdyń turaqty ortalyǵyna aınalýdy kózdeıdi. Sonymen qatar ol Ortalyq Azııa men Eýropa arasyndaǵy ózara tıimdi yntymaqtastyqty ilgeriletýge baǵyttalǵan.
Saýda úıiniń qyzmeti saýda men ınvestıtsııalardy qoldaýdy, birlesken kásiporyndar men ónerkásiptik jobalardy damytýǵa járdemdesýdi, óndiristik kooperatsııany keńeıtýdi, tehnologııalar men tájirıbe almasýdy, «Made with Italy» ónerkásiptik yntymaqtastyq úlgisin ilgeriletýdi, sondaı-aq gýmanıtarlyq jáne mádenı baılanystardy nyǵaıtýdy qamtıdy.
Saýda úıiniń ınfraqurylymynda iskerlik kelissózder men kezdesýler ótkizýge arnalǵan keńseler, bıznes-forýmdar, tanystyrylymdar men resmı is-sharalarǵa arnalǵan konferents jáne kórme zaldary, sondaı-aq ózara is-qımyldyń aralas formattaryn uıymdastyrýǵa múmkindik beretin zamanaýı tsıfrlyq sheshimder qarastyrylǵan.
Іskerlik ózara árekettestikti qosymsha qoldaý maqsatynda alańda Qazaqstannyń damý ınstıtýttarynyń aqparattyq buryshtary ornalastyrylady. Olardyń qatarynda Kazakh Invest, QazTrade, Kazakh Export jáne Kazakh Tourism bar. Bul uıymdar yntymaqtastyq múmkindikteri men memlekettik qoldaý sharalary týraly ózekti aqparat usynady.
— Saýda úıiniń ashylýy Qazaqstannyń eýropalyq baǵyttaǵy ekonomıkalyq dıplomatııasyn damytýdaǵy mańyzdy qadam retinde qarastyrylady jáne ekijaqty yntymaqtastyqty jańa sapaly deńgeıge shyǵarýǵa múmkindik beredi. Atalǵan joba eki el arasyndaǵy joǵary deńgeıde qol jetkizilgen kelisimderdiń nátıjesi sanalady. Onyń ishinde Italııa Premer-mınıstri Djordjııa Melonıdiń Astanaǵa resmı sapary, sondaı-aq ýákiletti memlekettik organdardyń, damý ınstıtýttarynyń jáne isker toptardyń júıeli ózara is-qımyly bar, — delingen habarlamada.
Osydan buryn Italııada ótetin Olımpıadaǵa ketken shyǵyn 5 mıllıard dollardan asqanyn jazǵanbyz.