Almatyda Qazaqstan-Reseı ekinshi medıaforýmy ótti
ALMATY. KAZINFORM — Almatyda Qazaqstan-Reseı ekinshi medıaforýmy uıymdastyryldy. Oǵan eki eldiń jetekshi medıaqurylymdarynyń basshylary qatysty.
Qazaqstan Respýblıkasynyń Memlekettik keńesshisi Erlan Qarın men Reseı Federatsııasy Prezıdenti Ákimshiligi basshysynyń orynbasary — Reseı Prezıdentiniń baspasóz hatshysy Dmıtrıı Peskov medıaforým qatysýshylaryna arnap quttyqtaý sóz sóıledi.
— Prezıdentter Qasym-Jomart Toqaev pen Vladımır Pýtın eki el arasyndaǵy yntymaqtastyqtyń ózgelerge úlgi bolarlyq sıpatta ekenin únemi atap ótedi. Osyndaı óte joǵary deńgeıdegi yqpaldastyqty saqtaý ekijaqty qarym-qatynastyń barlyq baǵytyndaǵy kúndelikti júıeli jumysty qajet etedi, — dep atap ótti Erlan Qarın.
Sondaı-aq Memlekettik keńesshi elimizde júrgizilip jatqan ózgeristerdiń eleýli nátıjeleri týraly aıtty jáne BAQ salasyndaǵy yntymaqtastyqqa toqtalyp ótti.
— Álemdegi túbegeıli ózgerister men aqparattyq kún tártibiniń turaqty jańarýy jaǵdaıynda bizdi ortaq maqsat jolynda biriktiretin jáne alǵa bastaıtyn dúnıelerdi saqtap, ári qaraı damytýymyz kerek, — dedi.
RF Prezıdentiniń baspasóz hatshysy Dmıtrıı Peskovtyń aıtýynsha, bizdiń elderimiz arasyndaǵy saýda-ekonomıkalyq baılanystardan bólek, mádenıet pen medıa salasyndaǵy yntymaqtastyqqa da erekshe mán berilip keledi. Qazirgi tańda Reseı tarapy Qazaqstan Prezıdentiniń qarasha aıynda ótetin memlekettik saparyna daıyndalyp jatyr. Qujattardyń kólemdi paketine qol qoıý josparlanǵan.
— Álemde bolyp jatqan oqıǵalar aıasynda aqparattyń rólin asyra baǵalaý múmkin emes, sonymen qatar bul bizdiń elder arasyndaǵy seriktestikti odan ári nyǵaıtý turǵysynan da asa mańyzdy. Osy oraıda forýmnyń turaqty sıpat alǵany qýantady. Bul rette qazaqstandyq tarapqa da, TASS agenttigine de osy formatty damytýǵa baǵyttalǵan kúsh-jigeri úshin alǵysymdy bildiremin. Meniń oıymsha, forýmǵa qoldanbaly sıpat berý óte mańyzdy. Pikirtalas árqashan paıdaly, eki eldiń BAQ ókilderi bas qosyp otyrǵandyqtan, bizdiń úkimetterge rıtorıkany jetildirý, yntymaqtastyqtyń jańa formattaryn qurý, máselelerdi joıý turǵysynda qandaı usynystar berý kerektigin olardan artyq kim biledi jáne, shyn máninde, muny úkimetten talap etý de BAQ-tyń mindeti, — dedi Dmıtrıı Peskov.
Іs-sharanyń plenarlyq bóliminde Qazaqstannyń Mádenıet jáne aqparat mınıstri Aıda Balaeva, Reseıdiń Tsıfrlyq damý, baılanys jáne buqaralyq kommýnıkatsııalar mınıstriniń orynbasary Bella Cherkesova, Qazaqstan Respýblıkasy Prezıdenti Teleradıokesheniniń dırektory Raýshan Qajybaeva jáne TASS aqparat agenttiginiń bas dırektory Andreı Kondrashov sóz sóıledi.
Mádenıet jáne aqparat mınıstri Aıda Balaeva forýmda Qazaqstannyń tatý kórshilik saıasatyn dáıekti túrde ustanatynyn, bul onyń aqparattyq saıasaty men ashyqtyǵynyń joǵary deńgeıinde aıqyn kórinetinin atap ótti. MIR jáne MIR24 telearnasynyń qazaqstandyq bólimshesi jyl saıyn telebaǵdarlamalardyń 10-nan astam tsıklyn, 15-20 derekti fılm jáne 1600-ge jýyq jańalyq sıýjetin shyǵarady. Sonyń nátıjesinde qazaqstandyq medıakontent Reseıdiń 20%-yndaı aýmaǵyn qamtyp otyr.
— Búginde ortaq tarıhı belesterge, kórnekti tulǵalarǵa, baı mádenı muraǵa, týrıstik múmkindikterge, memleket jetistikterine arnalǵan birlesken jobalardyń aýqymyn keńeıtý mańyzdy, — dep atap ótti mınıstr.
Talqylanǵan mańyzdy baǵyttardyń biri BAQ-ta jasandy ıntellektini paıdalaný, sondaı-aq jalǵan aqparattyń ádeıi taralýyna qarsy áreketti úılestirý máseleleri boldy. Prezıdent Teleradıokesheniniń dırektory Raýshan Qajybaeva qazaqstandyq-reseılik medıaforým ózara is-qımyldy keńeıtýge jáne tájirıbe almasýǵa yqpal etetin jaqsy dástúrge aınalyp kele jatqanyn atap ótti.
— Birlesken jumys barysynda biz nazarda ustaıtyn negizgi másele — medıa salasyndaǵy destrýktıvti úrdisterge, feıkterdiń taralýyna qarsy turý. Búgin barlyq spıker atap ótkendeı, jasandy ıntellekt arqyly taraıtyn feıkter bar. Bul jumystaǵy eń mańyzdy qural — sarapshylar qaýymdastyǵyn tarta otyryp, halyqtyń qarjylyq, aqparattyq jáne basqa da salalardaǵy saýattylyǵyn arttyrý, — dedi Raýshan Qajybaeva.
ITAR-TASS bas dırektory Andreı Kondrashov TASS senimdilik pen kontent sapasynyń joǵary standarttaryn saqtaı otyryp, jalǵan aqparattyń taralýymen dáıekti túrde kúresip otyrǵanyn atap ótti.
— Biz halyqaralyq faktchekıng qaýymdastyǵyna qosylýǵa shaqyramyz. Blogerler, frılanserler, jýrnalıster, ınternet-platformalar — barlyǵy da qosyla alady. Ol naqty jumys isteıdi jáne oǵan kóz jetkize alasyz. Bul rette biz qazaqstandyq áriptesterimizben belsendi jumys istep kelemiz jáne kórshilerimizge qyzyǵýshylyq tanytyp otyrmyz. Ótken jyly TASS Qazaqstan týraly 6 myńǵa jýyq, al 2025 jyldyń basynan bergi ýaqyttyń ózinde 5 myńǵa jýyq materıal shyǵardy. Bul jarııalanymdarǵa Reseıde de, shetelde de belsendi silteme jasaldy, — dedi ol.
Prezıdenttiń Teleradıokesheni uıymdastyrǵan bul is-shara 2024 jylǵy qarashada Máskeýde ótken Qazaqstan-Reseı birinshi medıaforýmynda ITAR-TASS kótergen bastamalardyń jalǵasy sanalady.
Medıa-forýmǵa Qazaqstan tarapynan QR Prezıdenti janyndaǵy Ortalyq kommýnıkatsııalar qyzmetiniń dırektory Asqar Omarov, QR Parlamenti Májilisiniń depýtaty Nıkıta Shatalov, QR SІM Halyqaralyq aqparat komıtetiniń tóraǵasy Aıbek Smadııarov qatysty. Reseı delegatsııasynyń quramynda RF Memlekettik dýmasynyń depýtaty Marına Kım, Tsıfrlyq damý, kommýnıkatsııalar jáne buqaralyq kommýnıkatsııalar mınıstriniń orynbasary Bella Cherkesova boldy. Sondaı-aq iri qazaqstandyq jáne reseılik BAQ basshylary qatysty.