Almatyda Qazaqstan men Reseı Qorǵanys mınıstrleri kelissóz júrgizdi
ASTANA. KAZINFORM – Qazaqstan qorǵanys vedomstvosynyń basshysy Ujymdyq qaýipsizdik týraly shart uıymy Qorǵanys mınıstrleri keńesiniń otyrysyna kelgen reseılik áriptesimen kezdesti.
General-polkovnık Rýslan Jaqsylyqov Andreı Beloýsovty Qorǵanys mınıstri laýazymyna taǵaıyndalýymen quttyqtady.
Taraptar ekijaqty áskerı yntymaqtastyqtyń ózekti aspektilerin talqylap, kadr daıyndaý jáne Ujymdyq qaýipsizdik týraly sharty uıymy sheńberindegi oqý-jattyǵýlardy qosa alǵanda, birlesken is-sharalardy ótkizý máselelerin qozǵady.
Sondaı-aq, óńirlik uıymdar aıasyndaǵy ózara is-qımyl týraly da sóz boldy. 2024 jyly Qazaqstan UQShU men ShYU-ǵa, al Reseı TMD-ǵa tóraǵalyq etedi. Taraptar memleketaralyq birlestikterdegi yntymaqtastyq óńirlik qaýipsizdikti nyǵaıtýǵa yqpal etetinin atap ótti.
«Onyń praktıkalyq turǵyda iske asyrylýy kópjaqty oqý-jattyǵýlar sheńberinde de júzege asyrylady. General-polkovnık Rýslan Jaqsylyqov reseılik áriptesin bıylǵy jyldyń shilde aıynda Qazaqstannyń batysynda „Birlestik“ oqý-jattyǵýy ótetininen habardar etti. Birlesken is-qımyldardyń josparyna sáıkes Ázerbaıjan, Qyrǵyzstan, Tájikstan jáne Ózbekstan áskerı kontıngentteri qarýly qaqtyǵystardy oqshaýlaýǵa jáne zańsyz quralymdarǵa qarsy is-qımylǵa baılanysty oqý-jaýyngerlik mindetterdi birlesip pysyqtaıdy», - delingen habarlamada.
Kezdesý qorytyndysy boıynsha qorǵanys vedomstvolarynyń basshylary kópjosparly ózara is-qımyldy jalǵastyrýǵa ýaǵdalasty.
