Almatyda Qazaqstan men Qytaı arasyndaǵy Strategııalyq dıalogtyń ekinshi otyrysy ótti
ALMATY. KAZINFORM – QR Premer-mınıstriniń orynbasary – Syrtqy ister mınıstri Murat Nurtileý jáne QKP OK saıası bıýrosynyń múshesi, Qytaı Halyq Respýblıkasynyń syrtqy ister mınıstri Van I Qazaqstan men Qytaı arasyndaǵy Strategııalyq dıalogtyń ekinshi otyrysyna qatysty.
Strategııalyq dıalog otyrysy barysynda taraptar saıası, saýda-ekonomıkalyq jáne mádenı-gýmanıtarlyq yntymaqtastyqtyń keń aýqymdy máselelerin talqylady. Mınıstrler bıik jáne joǵary deńgeılerde qol jetkizilgen ýaǵdalastyqtardyń iske asyrylý barysyn qarastyrdy, sondaı-aq ekijaqty ózara is-qımyldyń barlyq spektri boıynsha qazaq-qytaı qatynastary damýynyń oń serpinin atap ótti.
Saýda-ekonomıkalyq baılanystardy arttyrý boıynsha birlesken kúsh-jigerge erekshe nazar aýdaryldy. Qazaqstannyń Qytaıǵa shıkizattyq emes eksportyn ulǵaıtýdy qosa alǵanda, ındýstrııalyq-ınvestıtsııalyq, energetıkalyq, tranzıt-kóliktik jáne ınnovatsııalyq yntymaqtastyqty birlesip damytýda jańa tásilderdi ázirleý qajettiligi basa aıtyldy.
– Árqashan damı beretin baılanysymyz geosaıası syn-qaterler men konıýnktýralyq úrdisterge ushyramaıdy. Qytaı biz úshin meıirimdi kórshi jáne senimdi dos qana emes, sonymen qatar jan-jaqty baılanysy bar jaqyn el, – dep málimdedi M.Nurtileý.
Byltyr ekijaqty taýar aınalymy rekordtyq kórsetkish – 43,8 mlrd AQSh dollaryn qurady. Eki memleket te jaqyn arada ózara saýda kólemin eki esege arttyrýǵa umtylýda. Qazaq-qytaı ınvestıtsııalyq pýly shamamen 66,4 mlrd AQSh dollary somasyna 224 jobany qamtıdy.
– Biz Qazaqstandy Qytaıdyń kórshiles memlekettermen qarym-qatynasynda basty seriktes retinde qarastyramyz. Qytaı Qazaqstannyń aýmaqtyq tutastyǵyn, egemendigin jáne qaýipsizdigin qorǵaýda, sondaı-aq ulttyq erekshelikterine sáıkes eldiń damýyna baǵyttalǵan kúsh-jigerin nyq qoldaıdy, – dep atap ótti Van I.
Syrtqy saıası vedomstvolarynyń basshylary bıyl josparlanǵan ekijaqty saparlar men is-sharalar kestesin talqylady, sondaı-aq halyqaralyq kún tártibindegi ózekti máseleler boıynsha «saǵattardy teńestirdi».
Kezdesý qorytyndysy boıynsha QR-QHR syrtqy ister mınıstrlikteri arasynda 2026-2028 jyldarǵa arnalǵan yntymaqtastyq týraly memorandýmǵa qol qoıyldy jáne Gýanchjoý qalasynda Qazaqstan Respýblıkasynyń Bas konsýldyǵyn qurý týraly notalarmen almasý rásimi ótti.
Aıta keteıik Qytaı SІM basshysy 26 sáýirde ótetin «Ortalyq Azııa – Qytaı» formatyndaǵy syrtqy ister mınıstrleriniń kezdesýine qatysý úshin Almatyǵa jumys saparymen keldi.
Eske salaıyq, buǵan deıin Qazaqstan men Qytaı ekonomıkalyq yntymaqtastyqtyń jańa jol kartasyn ázirleýge daıyn ekeni habarlanǵan bolatyn.