Almatyda Qazaqstan - Qytaı jer silkinisin zertteý ortalyǵy ashyldy
ASTANA. KAZINFORM – Almatyda bolashaq Qazaqstan-Qytaı birlesken jer silkinisin zertteý ortalyǵy ǵımaratynyń ashylý rásimi ótti. Bul týraly Tótenshe jaǵdaılar mınıstrligi habarlady.
Іs-sharaǵa Tótenshe jaǵdaılar mınıstri, general-leıtenant Shyńǵys Árinov, Almaty qalasynyń ákimi Darhan Satybaldy, Qytaı Halyq Respýblıkasynyń Almatydaǵy Bas konsýly Sý Fantsıý, QHR Jer silkinisteri jónindegi ákimshiliginiń Geofızıka ınstıtýtynyń ókilderi, memlekettik organdardyń, ǵylymı qoǵamdastyqtyń ókilderi jáne shaqyrylǵan qonaqtar qatysty.
Ǵımarattyń ashylýy seısmıkalyq qaýipsizdik salasyndaǵy Qazaqstan men Qytaı arasyndaǵy yntymaqtastyqty damytýdyń mańyzdy kezeńine aınaldy.
Qazaqstan tarapy bolashaq birlesken ortalyqtyń jumys isteýi úshin qajetti ınfraqurylymdy qurdy. Ekijaqty ǵylymı ózara is-qımyldy júıeli túrde damytý maqsatynda Qazaqstan-Qytaı birlesken jer silkinisterin zertteý ortalyǵyn qurý týraly úkimetaralyq kelisimge qol qoıylǵanǵa deıin Ulttyq seısmologııalyq baqylaýlar men zertteýler ǵylymı ortalyǵynyń qurylymynda úsh mamandandyrylǵan zerthanany qamtıtyn Jer silkinisin zertteý ortalyǵy quryldy.
Atalǵan zerthanalardyń fýnktsıonaldyq baǵyty bolashaq birlesken ortalyqtyń josparlanǵan jumys modeline sáıkes keledi. Bul qazirgi kezeńniń ózinde birlesken ǵylymı zertteýlerdi bastaýǵa múmkindik beredi. Osy maqsatta Qazaqstan men Qytaıdyń ǵylymı uıymdary Qazaqstan Respýblıkasy Tótenshe jaǵdaılar mınıstrliginiń «Ulttyq seısmologııalyq baqylaýlar men zertteýler ǵylymı ortalyǵy» JShS men QHR Jer silkinisteri jónindegi ákimshiliginiń Geofızıka ınstıtýty arasynda geofızıka jáne seısmologııa salasyndaǵy ǵylymı-tehnıkalyq yntymaqtastyq týraly ózara túsinistik týraly memorandýmǵa qol qoıdy.
Birlesken jobany iske asyrý Qazaqstan men Qytaı arasyndaǵy ǵylymı ózara is-qımyldyń jańa kezeńine jol ashady. Zertteý nátıjeleri seısmıkalyq belsendilikti monıtorıngileý men boljaýdyń zamanaýı ádisterin damytýǵa, sondaı-aq eki eldiń seısmıkalyq qaýipsizdik deńgeıin arttyrýǵa eleýli úles qosady dep josparlanǵan.
Japonııanyń Honsıý aralynyń jaǵalaýynda 5,4 baldyq jer silkinisi bolǵanyn jazǵan edik.
