Almatyda «Qazaqfılm» jerine qatysty taǵy daý shyqty

Qazaqstan kınogerler odaǵynyń basqarma múshesi, kınodramatýrg, akter Erlan Tóleýtaı kınogerler atynan QR Premer-mınıstriniń orynbasary Nurlybek Nálibaevqa úndeý jasady.

Onyń jazýynsha, Sháken Aımanov atyndaǵy «Qazaqfılm» kınostýdııasy tóńireginde aýyr ahýal qalyptasqan. Onyń birinshisi — jer máselesi. Erlan Tóleýtaı Almaty ákimi Baýyrjan Baıbek bolǵan kezde kınostýdııa jeri alynbaq bolǵanyn, biraq Prezıdent aralasýymen bul áreket toqtatylǵanyn atap ótti. Aıtýynsha, 4 jyl ótken soń Almaty ákimdigi «Qazaqfılmniń» 5,5 gektar jerin qaıtadan alyp qoımaq.

— Almaty qalalyq ákimshiliginiń qoldaýymen ózderiniń aram pıǵyldaryn júzege asyrý maqsatynda «Qazaqfılmniń» jerine túsiniksiz qurlys nysandaryn salýdy bastaǵaly jatyr. Olar áýeli «Kınematografıster parkin» salamyz degen jeleýmen «Qazaqfılm» terrıtorııasyna ózderiniń aram tumsyqtaryn tyǵyp almaq. Keıin kele negizgi jobalary — iri qurlys nysandaryn salyp tastaý arqyly kınostýdııanyń 5.5 gektar jerin basyp, bútin paıdalanyp ketpek. Árıne, biz — kınogerler qaýymy buǵan qarsymyz ári kınostýdııanyń bir súıem jerin talan-tarajǵa salýǵa jol bermeıtinimizdi málimdeımiz, — dep jazdy ol.

Áleýmettik jelilerdegi osy jáne ózge de jarııalanymdarǵa qatysty Sh. Aımanov atyndaǵy «Qazaqfılm» AQ resmı málimdeme jasady. Kınostýdııa málimetinshe, «Qazaqfılm» janyndaǵy 5,5 gektar aýmaqta otandyq kınematografııa tarıhy men kıno óneriniń kórnekti tulǵalaryna arnalǵan zamanaýı saıabaq salý jumystary qolǵa alynǵan.

— Bul aýmaq barshaǵa ashyq ári qoljetimdi, qala turǵyndarynyń serýendeýine, demalýyna jáne bos ýaqytyn tıimdi ótkizýine arnalǵan keńistik bolady dep kútilýde. Atalǵan aýmaq tolyqtaı memlekettik menshikke jatady jáne qalalyq jer qorynda ornalasqan. Saıabaq aýmaǵynda eshqandaı jeke nemese kommertsııalyq nysandar salý kózdelmegen, — delingen málimdemede.

Sondaı-aq Sh. Aımanov atyndaǵy «Qazaqfılm» kesheni respýblıkalyq mańyzy bar tarıh jáne mádenıet eskertkishi sanalatyndyqtan, kınostýdııanyń tarıhı murasy men óndiristik ınfraqurylymy — árdaıym memlekettiń qorǵaýynda ekeni atap ótildi.

— Úshinshiden, «kınostýdııanyń bankrotqa ushyrýy» jáne basqa da alyp-qashpa áńgimeler shyndyqqa janaspaıtynyn atap ótemiz. «Qazaqfılm» AQ óz qyzmetin shtattyq rejımde jalǵastyryp keledi. Osy rette azamattardy jalǵan aqparat taratpaýǵa shaqyramyz, — dep málimdedi «Qazaqfılm».

Odan bólek kınostýdııa ózderi jaıly jalǵan aqparat taratqan azamattar boıynsha quqyq qorǵaý organdaryna jáne sotqa júginetinin habarlady.

Eske salaıyq, 2024 jyly «Qazaqfılm» tóńireginde daý bolǵan bolatyn. Ol kezde stýdııa Rysqulov dańǵyly, 101B mekenjaıynda ornalasqan jer telimi men burynǵy «Qazkınoprokat» ǵımaratynyń satylǵanyn joqqa shyǵardy.

Byltyr «Qazaqfılm» jeriniń satylýy, kınostýdııany Astanaǵa kóshirilýi týraly qaýesetterge Mádenıet jáne aqparat mınıstri Aıda Balaeva jaýap berdi.

Sonymen qatar Aıda Balaeva «Qazaqfılm» men «Qazaqanımatsııa» mekemeleriniń tóńiregindegi daýǵa pikir bildirdi.

Keıin 2026 jyly Qazaqfılmge qatysty aýqymdy ózgeris bolatyny habarlandy.