Almatyda «Qazaqfılm» parkiniń tujyrymdamasy ázirlenip jatyr

Qoǵamdyq keńistikterdi damytý basqarmasynyń málimetinshe, «Qazaqfılm» kınematografııalyq parki serýendeýge, demalýǵa jáne otandyq kıno ónerimen tanysýǵa arnalǵan zamanaýı oryn bolmaq.

Keńistikte birneshe taqyryptyq aımaq qurý kózdelgen. Olardyń árqaısysy kelýshilerdi otandyq kınematografııanyń ár kezeńdegi damý tarıhymen tanystyrady.

Joba aıasynda serýendeýge arnalǵan alleıalar, ınteraktıvti jáne mýltımedııalyq ınstallıatsııalar, ashyq aspan astynda fılmder kórsetýge arnalǵan amfıteatr, balalar alańy men demalys aımaqtaryn salý qarastyrylǵan.

— Qazaqstan kınosynyń tarıhyn vızýaldy elementter arqyly ǵana emes, zamanaýı ınteraktıvti formattar arqyly da tanystyrý kózdelip otyr. Bul kelýshilerge kınematografııanyń damý jolymen, aıtýly týyndylarmen jáne elimizdiń mádenı murasymen qoljetimdi ári zamanaýı formatta tanysýǵa múmkindik beredi, — delingen habarlamada.

Eske salsaq, Aıda Balaeva «Qazaqfılmniń» otbasylyq demalys ortalyǵyna aınalatynyn málimdegen edi.