Almatyda qazaq jáne qytaı sýretshileriniń týyndylary qoıylǵan halyqaralyq kórme ashyldy
ASTANA. KAZINFORM — Ábilhan Qasteev atyndaǵy Ulttyq óner mýzeıinde «Jibek jolynyń sheksiz bulttary. «Bir beldeý, bir jol»: Almaty beketi» atty halyqaralyq kórme ashyldy. Kórmeni mýzeı ujymy Shanhaı óner kollektsııasy mýzeıimen (SACM) birlesip uıymdastyrdy.
Halyqaralyq joba buǵan deıin 2024 jyly Tegeranda, 2025 jyly Tashkentte tanystyrylǵan. Almaty kórmeni qabyldaǵan úshinshi qala boldy.
Kórmege qazaqstandyq jáne qytaılyq sýretshilerdiń eki eldiń mádenı dástúrleri men qazirgi beıneleý óneriniń baǵyttaryn qamtıtyn eńbekteri qoıyldy.
Qazaqstandyq toptama Ábilhan Qasteev atyndaǵy mýzeı qorynda saqtalǵan zamanaýı sýretshilerdiń týyndylarynan jasaqtalǵan. Al Qytaı toptamasynan dástúrli keskindeme týyndylaryn, kóne qabyrǵa sýretteriniń naqyshtaryn jáne zamanaýı ádistermen oryndalǵan shyǵarmalardy kórýge bolady.
Joba eki eldiń mádenı baılanysyn nyǵaıtýǵa, mýzeıler arasyndaǵy áriptestikti damytýǵa jáne óner murasyn keńinen nasıhattaýǵa baǵyttalǵan.
Kórmeniń Qazaqstanda ótýiniń ózindik máni de bar. «Jibek jolynyń ekonomıkalyq beldeýin» qurý bastamasy alǵash ret 2013 jylǵy qyrkúıekte elimizde kóterilgen edi.
Mádenıet jáne aqparat mınıstrligi málimetinshe, kórme 2026 jylǵy 18 qarashaǵa deıin jalǵasady.
Buǵan deıin Almatyda taý sportynyń ańyzdaryna arnalǵan kórme ashylǵanyn jazǵan edik.
