Almatyda menedjerlerdi qazaq tilinde daıarlaýǵa baǵyttalǵan baǵdarlama tanystyryldy
ALMATY. KAZINFORM — Almaty qalasynda Qazaq MBA (Bıznes ákimshiligi magıstri) baǵdarlamasynyń resmı tanystyrylymy ótti.
Іs-sharada kásibı menedjerler tapshylyǵy men memlekettik tilde sapaly bıznes-bilim berýdiń mańyzy talqylandy.
META Ýnıversıtetiniń bazasynda qurylǵan MBA baǵdarlamasynyń negizgi maqsaty – zamanaýı top-menedjerlerdi daıyndaý jáne belgili bir deńgeıge jetip, ári qaraı kásibin damyta almaı otyrǵan kásip ıelerine arnaıy bilim berý.
Bıznes mektep dırektory Maqsat Halyqtyń aıtýynsha, iskerlik ortadaǵy belsendiliktiń artýy ekonomıkalyq ósimge de tikeleı áser etedi.
– Buǵan deıin Qazaqstanda MBA baǵdarlamasy tek orys jáne aǵylshyn tilderinde júrgizilgen. Sońǵy úsh jylda qazaq tilinde oqytýdy qolǵa aldyq. Bul – ulttyq rýhy bar, zamanaýı oılaıtyn, qazaq tilinde erkin sóıleıtin kásipkerlerdi kóbeıtýge baǵyttalǵan joba. Oǵan qosa bıznes-kontenttiń qazaqshalanýy ǵylymnyń da qazaqshalanýyna jol ashady, óıtkeni bıznes ǵylymǵa degen suranysty týdyrady, – dedi ol.
Baǵdarlamaǵa qatysý úshin tyńdaýshyǵa kem degende eki jyl basqarýshylyq tájirıbesiniń nemese jeke kásip júrgizý tájirıbesiniń bolýy talaby qoıylady.
Dáristerdi qazaq tilinde berý úshin tájirıbeli mamandar, «Bolashaq» túlekteri tartylyp, aǵylshyn tilindegi túpnusqa materıaldar tikeleı qazaqshaǵa aýdarylyp usvnylýda.
Aldaǵy ýaqytta Orta Azııada bilikti menedjerlerge degen suranys arta túsedi. Qazaqstanda, ásirese, antıkrızıstik menedjment pen táýekelderdi basqarý salasynda bilikti mamandarǵa suranys joǵary.
– Sońǵy jyldardaǵy tótenshe jaǵdaılar – sý tasqyny, órt, álemdik turaqsyzdyqtar antıkrızıstik menedjerlerdiń mańyzyn kórsetti. Bul bilimderdi bilmeý mıllıondaǵan shyǵynǵa ákelýi múmkin. Basty artyqshylyǵymyz – bilim qazaqsha beriledi, – dedi Maqsat Halyq.
Aıta ketelik, 2026 jyldan bastap shaǵyn bızneske salyq mólsherlemesi 2%-ǵa deıin tómendeıdi.