Almatyda qazaq baletiniń 90 jyldyǵyna arnalǵan kórme ashyldy
ALMATY. KAZINFORM – Ábilhan Qasteev atyndaǵy QR Memlekettik óner mýzeıinde «Qazaq baleti: 90 jylǵy tarıh» atty kartınalar kórmesi ashyldy.
«Qazaq baleti: 90 jylǵy tarıh» kartınalar kórmesi Toǵjan Moldalimniń jetekshilik etetin Qazaq Ballet kreatıvti zerthanasy jasaǵan «Qazaq baletine 89 jyl» art-albom jobasynyń jalǵasy.
Kórme mýzeı, teatr jáne jeke muraǵattardan alynǵan sırek muraǵattyq fotosýretter, beınejazbalar men mátinder negizinde jasalǵan avtorlyq kartınalardan turady. Qazaqstannyń kásibı horeografııalyq ónerindegi 90 jyldyq kezeńindeg týyndysy kórsetilgen, onda ulttyq spektaklder kórinisi beınelengen.
«Bul kartınalar Qazaqstan Respýblıkasy Ortalyq memlekettik kıno, fotoqujattar jáne dybys jazbalary muraǵatynyń fotoqujattarynan, keıbireýleri beınejazbalardan, lıbrettonyń sıpattamasynan, zamandastarynyń estelikteri men sýrettegenderdiń derekteri boıynsha keltirildi. Óıtkeni bári saqtalmady jáne biz bárin muqııat jınaýǵa tyrystyq. Biz sırek kezdesetin muraǵat fotosýretterinen birneshe kartına jınadyq. Jalpy, olar spektakl jasalǵan kezdegi atmosferany, dáýirdi jańǵyrtty. Biz kartınalarda naqty sýretshilerdi qaıta shyǵarmaımyz, spektakldiń beınesi osynda beınelengen, balettiń tús shemasy men negizgi kórinisteri tańdalǵan», - deıdi kórmeni uıymdastyrýshy Qazaq Ballet Creative Lab jetekshisi Damır Orazymbetov.
Uıymdastyrýshylardyń aıtýynsha, bul kórmeniń ereksheligi – qazaq baletiniń san ǵasyrlyq ómiriniń shyndyǵyn aıqyndaıtyn tarıhı-mıfologııalyq taqyryptardy, ertegiler áleminiń ǵajaıyp beınelerin, qımyl-qozǵalystaryn beıneleıtin týyndylarǵa negizdelýinde. Sonymen qatar, bul týyndylar Qazaqstandaǵy mýzyka sahnasynyń búgingi kórinisin beıneleıdi jáne ótkenniń «qupııasyn» ashady.
Atap aıtsaq, Abaı̆ atyndaǵy Qazaq ulttyq opera jáne balet teatry, Qazaqstan Respýblıkasy memlekettik akademııalyq bı teatry, «Samuryq» zamanaýı bı teatry, apaly-sińlili Gabbasovalar bı teatry, K. Baı̆seı̆itova atyndaǵy ulttyq opera jáne balet teatry, «Astana Balet» teatry, «Astana Opera» memlekettik opera jáne balet teatrynyń spektaklderi bar. Sondaı̆-aq A. Seleznev atyndaǵy Almaty horeografııalyq ýchılışesiniń jáne Qazaq ulttyq óner ýnıversıtetiniń stýdentteriniń qoı̆ylymdary usynylǵan.
Bıyl qazaq baletine 90 jyl.
Damır Orazymbetovtyń aıtýynsha, osy ýaqyt ishinde kóp nárse ózgerdi.
«Sońǵy jyldary biz zamanaýı tehnologııalardyń damýynyń arqasynda jahandyq teatr protsesterin tamashalaý múmkindigine ıe boldyq. Jas horeograftarymyz osy úrdisterdi baqylap, ilesýge tyrysyp jatyr. Sondyqtan búginde qazaq balet óneri zaman aǵymyna ilesip, jarqyn spektaklder qoıylyp, rejısserler shaqyrylyp, 20-ǵasyrdyń áıgili jaýharlary sahanalanyp jatyr. Qazir Qazaqstanda Irjı Kılıan, Djordj Balanchın jáne basqa da kóptegen tanymal horeograftardyń qoıylymdary qoıylyp jatqany biz úshin úlken qýanysh», - dep qosty ol.
Kórme maýsym aıynyń 7-ne deıin jalǵasady.