Almatyda qaıtarylǵan aktıvter esebinen 10 shaqyrym sý men káriz júrgizildi
ALMATY. KAZINFORM — Alataý aýdanynda qaıtarylǵan aktıvter esebinen eki joba qarjylandyryldy.
Almaty ákimdiginiń málimetinshe, Alataý aýdanynda iri ınfraqurylymdyq joba aıaqtaldy. 10 shaqyrymdaı ınjenerlik jeliler júrgizilip, «Aqbulaq» shaǵyn aýdany tolyǵymen aýyzsýmen jáne kárizben qamtyldy. Joba zańsyz shyǵarylǵan aktıvterdi qaıtarý esebinen júzege asyrylǵan.
— Qaıtarylǵan qarajat esebinen eki joba — «Aqbulaqta» jáne «Boraldaıda» iske asyrylyp jatyr. Prezıdent tapsyrmasyna sáıkes bul qarajat áleýmettik mańyzy bar nysandardyń qurylysyna baǵyttalyp otyr, — dedi Alataý aýdany ákimdigi ınjenerlik jáne jol ınfraqurylymy bóliminiń basshysy Abaı Toparbaı.
Ákimdik málimetinshe, «Boraldaı» shaǵyn aýdanyndaǵy joba da aıaqtalýǵa jaqyn. Munda 50 shaqyrymnan astam ınjenerlik jeli salynyp jatyr. Olar aýdandy aýyzsýmen jáne káriz júıesimen qamtamasyz etpek.
Eske salaıyq, buǵan deıin qaıtarylǵan aktıvter bıyl qansha tabys ákelgenin jazǵanbyz.