Almatyda qaıtadan ótip jatqan sotta basqarmanyń eks-basshysy sońǵy sózin aıtty
ALMATY. KAZINFORM – Almatyda qalalyq josparlaý jáne ýrbanıstıka basqarmasynyń burynǵy basshysy Almashan Ahmedjanov jáne jer qatynastary basqarmasynyń eks-basshysy Ardaq Samambetov, sondaı-aq ózge de tulǵalarǵa qatysty sot aıaqtalýǵa jaqyn.
Sot aıyptalýshylar oryndyǵynda otyrǵan alty adamnyń beseýiniń sońǵy sózin tyńdady. Al Almashan Ahmedjanovtyń sońǵy sózi kelesi aptaǵa shegerildi. Ol densaýlyq jaǵdaıyna baılanysty sottan osyndaı ótinish suraǵan bolatyn.
Sottalýshylardyń sońǵy sózi
Jer qatynastary basqarmasynyń burynǵy basshysy Ardaq Samambetov ózine taǵylǵan aıyppen kelispeıtinin jáne bul qylmystyq isti qoldan jasalǵan dep sanaıtynyn málimdedi.
— Ózimdi tolyqtaı qoldan qurastyrylǵan, ótirik ári burmalanǵan mán-jaılarǵa negizdelgen is boıynsha aıyptalyp otyrmyn dep esepteımin. Bul faktiler sot tergeýi barysynda tolyq ári naqty dáleldendi, — dedi ol.
Onyń aıtýynsha, sot protsessi kezinde jalǵan aryzdar men mamandardyń burmalanǵan qorytyndylaryna qatysty mán-jaılar zertteldi. Sonymen qatar sottalýshy aıyptaý tarapy usynǵan dálelder qylmystyq is qozǵalǵanǵa deıin jınalǵanyn alǵa tartty.
— Sizden eń aldymen bul isti qoldan jasalǵan jáne burmalanǵan dep tanýyńyzdy suraımyn. Ekinshiden, meni tolyqtaı aqtap, taǵylǵan azamattyq talap-aryzdardy qanaǵattandyrýdan bas tartýyńyzdy ótinemin, — dedi eks-sheneýnik.
Jerge ornalastyrý, jerdi alyp qoıý jáne rezervteý bóliminiń burynǵy basshysy Erlan Jarmuhanbetov te sońǵy sózin aıtty. Ol da kinásin moıyndamaı, ózi jasamaǵan qylmystary úshin tórt jylǵa jýyq ýaqyt qamaýda otyrǵanyn jetkizdi.
— Barlyq kýágerler meniń eshqandaı qylmystyq quqyq buzýshylyq jasamaǵanymdy aıtty. Meniń kinámdi dáleldeıtin eshqandaı aıǵaq bolǵan joq. Men tergeý ızolıatorynda tekten-tek tórtinshi jyl otyrmyn. Qurmetti sot, meni barlyq baptar boıynsha aqtaýyńyzdy, azamattyq talap-aryzdardan tolyqtaı bas tartýyńyzdy jáne tutqyndaý túrindegi bultartpaý sharasyn joıýyńyzdy suraımyn. Balalarym tirideı jetim qaldy. Ádil sheshim shyǵaratynyńyzǵa úmittenemin, — dedi sottalýshy.
Kásipker Berik Óskembaev kerisinshe kinásin tolyq moıyndady. Sońǵy sózinde ol keltirilgen shyǵyndy ótegenin aıtyp, sottan ózin bas bostandyǵynan aıyrmaıtyn jaza taǵaıyndaýdy surady.
Taǵy bir sottalýshy, kásipker Muhanbetáli Shalqarbekov sheshimdi sottyń qaraýyna qaldyrdy.
Baǵalaý kompanııasynyń dırektory Almazhan Baqırov ózine baǵalaýshy ókilettigin asyra paıdalandy degen aıyp boıynsha kinásin moıyndap, ókinish bildirdi.
— Óte qatty ókinemin. Sondaı-aq sottan meniń kópbalaly áke ekenimdi, kámeletke tolmaǵan balam bar ekenin jáne úshinshi toptaǵy múgedek ekenimdi eskerýdi suraımyn. Bas bostandyǵymnan aıyrmaıtyn úkim shyǵarýyńyzdy ótinemin, — dedi ol.
Іs týraly ne belgili
Almashan Ahmedjanov 2023 jyldyń jazynda ustalǵan bolatyn. Ol Almatyda jer telimderin berý jáne qurylys nysandaryn kelisý kezinde ókilettigin asyra paıdalandy dep kúdikke ilindi.
2025 jyldyń aqpanynda bul is boıynsha barlyq alty adamǵa qatysty sot úkimi shyqqan bolatyn. Almashan Ahmedjanov 11 jylǵa, Ardaq Samambetov 10 jylǵa, Erlan Jarmuhanbetov 14 jylǵa, Almazhan Baqırov 8 jylǵa bas bostandyǵynan aıyrylǵan. Al kásipkerler Muhanbetáli Shalqarbekov pen Berik Óskembaevqa bes jyldan shartty jaza taǵaıyndaldy.
Alaıda 2026 jyldyń aqpanynda Almaty qalalyq soty bul úkimniń kúshin joıdy. Keıinnen qylmystyq-protsestik zańnamanyń buzylýyn joıý úshin qylmystyq is prokýrorǵa qaıtarylyp, sodan keıin qaıta sotqa berildi.
Іs Almaty qalasynyń qylmystyq ister jónindegi mamandandyrylǵan aýdanaralyq sotynda 2026 jyldyń sáýir aıynda qaıta qarala bastady.
