Almatyda qaıta óńdelgen materıaldan art-nysan jasaý baıqaýy bastaldy
ASTANA. KAZINFORM — Almatyda qaıta óńdelgen materıal men ekinshi rettik shıkizattan art-nysan jasaýǵa arnalǵan osy zamanǵy óner baıqaýy jarııalandy, dep habarlaıdy qalalyq ákimdiktiń baspasóz qyzmeti.
Baıqaýǵa sýretshiler, dızaınerler, sáýletshiler, shyǵarmashylyq joǵary oqý ornynyń stýdentteri, ekologııa men sanaly tutyný máselesine óner arqyly nazar aýdartýǵa daıyn barlyq nıet bildirgender qatysa alady. Baıqaýdyń bastalǵany týraly Óńirlik kommýnıkatsııalar qyzmetinde ótken baspasóz máslıhatynda «Taza sana» jobasynyń kýratory Dıana Álıeva málimdedi.
Onyń aıtýynsha, joba ekologııalyq máseleni ǵana sheshpeı, qorshaǵan orta men tutyný mádenıetine degen kózqarasty ózgertýge de baǵyttalypty.
— Dáris arqyly nemese qoqys tastamaýǵa shaqyrý arqyly ekologııalyq mádenıetti qalyptastyrý múmkin emes. Qoǵammen emotsııa, vızýaldy beıne, shyǵarmashylyq pen mádenıet arqyly sóılesý kerek, — dedi Dıana Álıeva.
Baıqaýdy ótkizý ıdeıasy «Taza sana» jobasynyń ekologııalyq alańdary barysynda paıda bolǵan. Spıkerdiń aıtýynsha, turǵyndar «Eko-núktelerge» plastık pen qaǵazdan bólek, kıim-keshek te ákele bastaǵan. Jınalǵan kıimniń bir bóligi muqtaj jandarǵa beriledi, jaramsyz toqyma buıymyn jańa ónim jasaýǵa paıdalanady, qalǵanyn janýarlarǵa arnalǵan panajaıǵa jóneltpek.
— Kez kelgen qoqysqa durys kózqaraspen qarasa, ony qaıtara paıdalanýǵa bolady. Óıtkeni adam balasy ol zattyń qundylyǵyn kórýden qalǵan kezde ǵana ol birtindep qoqysqa aınalady, — dep atap ótti jobanyń jetekshisi.
Baıqaý aıasynda qatysýshylarǵa qaıta óńdelgen materıaldan ınstallıatsııa, músinr, kóshe art-nysandary men basqa da kórkem kompozıtsııalar jasaýdy usynbaqshy. Bastamanyń negizgi maqsaty — qaldyqty qaıtara paıdalanýdyń múmkindigin kórsetý men qaıta óńdeý, qorshaǵan ortanyń lastanýy men jaýapty tutyný máselesine qoǵamnyń qoldan kelgenshe nazaryn aýdarý.
Uıymdastyrýshylar art-nysandardyń qaladaǵy qoǵamdyq keńistiktiń bir bóligine aınalyp, turǵyndardy ekologııalyq kún tártibin talqylaýǵa tartýǵa yqpal etedi dep úmittenedi.
Baıqaýdyń ótý barysy @taza_sana.almaty jobasynyń áleýmettik jelilerindegi paraqshalarynda keńinen jarııalanyp otyrady. Uıymdastyrýshylar qatysýshylardyń jumysyn kórsetip, jas sýretshiler týraly aqparat berip, shyǵarmashylyq úderisti tanystyryp, zamandyq vızýaldy óner formattary arqyly jastardyń ekologııa máselesine qyzyǵýshylyǵyn arttyrýdy josparlap otyr.
Budan buryn Almatyda monshalarǵa qatysty ekologııalyq talaptar kúsheıtiletinin jazǵan edik.
