Almaty turǵyndary kóshelerdiń qaıta-qaıta qazylýyna qatysty shaǵymdandy
ALMATY. KAZINFORM – Almatyda jyl saıyn jazǵy ýaqytta ınjenerlik jelilerdi aýystyrý jáne aýqymdy jol jóndeý jumystary júrgiziledi.
Alaıda keıde tym uzaqqa sozylǵan ne durys josparlanbaǵan jumystarǵ turǵyndardyń ashýyn týdyrady. Áleýmettik jelilerde almatylyqtar qozǵalysty shektep, aınalma joldarmen júrýge, kepteliste turýǵa jáne aýyr tehnıkanyń shýyn estýge májbúr etetin jóndeý jumystaryna jıi renish bildiredi. Ásirese, sapaly jol tóselip, keıin ınjenerlik jelilerdi aýystyrý úshin ony qaıta sypyryp, barlyq jumystar bitken soń, sapasyz asfalt tóseý máselesi turǵyndar nazarynan tys qalmaıdy.
Oǵan aıqyn mysaldardyń biri — Myńbaev kóshesi. Ótken jyly Myńbaev kóshesiniń Manas kóshesinen Túrkebaev kóshesine deıingi bóliginde «Almaty sý» mekemesiniń tapsyrysy boıynsha jańa magıstraldy sý qubyry júrgizilgen. Alaıda jańa jeliler sapasyz bolyp, kommýnaldyq qyzmetterge bul aýmaqty birneshe ret qaıta qazýǵa týra keldi.
2026 jyly Myńbaev kóshesi taǵy qazyldy — bul joly Klochkov kóshesimen qıylysta bolǵan apatqa baılanysty jelilerdi aýystyrýǵa týra keldi. Sonyń saldarynan asfalt birneshe ret tóselgen. Al turǵyndar qazirgi jol jabynynyń sapasy burynǵydan áldeqaıda tómen ekenin aıtty.
Bostandyq aýdanynyń ákimi Azamat Qaldybekov kommýnaldyq qyzmetter tarapynan barlyq jumystar aıaqtalǵannan keıin ákimdik qazirgi ýaqytsha asfaltty jańasyna aýystyratynyn atap ótti.
- Bıyl Myńbaev kóshesinde joldy ortasha jóndeýdi josparlap otyrmyz. Asfaltty jol mamandary sııaqty eshkim qaıtadan sapaly tóseı almaıtynyn eskerý qajet. «Almaty sý» mekemesiniń beıini jol jóndeý emes, biraq sý qubyryn aýystyrý jobasynda olarda ýchaskeni tyǵyzdaý jáne asfalttaý mindettemesi bar. Degenmen, bul jumysty oryndaıtyn merdiger — beıindi maman emes. Sondyqtan biz qazý jumystary tolyq aıaqtalǵan soń, tamyz aıynda sapaly jańa asfalt tóseýge kirisemiz, — dedi Azamat Qaldybekov.
Onyń aıtýynsha, kóbine bir kóshede jóndeý jumystaryn ártúrli kompanııalar, sonyń ishinde: «AJK», «Almaty sý», «AlTS», «QazaqGaz Aimaq» júrgizedi. Alaıda olardyń jumysty oryndaý merzimderi ártúrli bolǵandyqtan, bir kósheni birneshe ret qazýǵa týra keledi. Osy máseleni sheshý úshin 2026 jyly Almaty ákimdigi ınteraktıvti karta ázirlegen. Onda aýdan aýmaǵynda júrgizilip jatqan nemese júrgiziletin kommýnaldyq jumystar, sondaı-aq jol qurylysy kórsetiledi.
- Biz qabattasyp ketetin jumystardyń qaı jerde júrip jatqanyna taldaý jasaı bastadyq. Apta saıyn qala ákiminiń nemese qala ákimi orynbasarynyń tóraǵalyǵymen ótetin jınalystarda árbir ýchaske boıynsha talqylaý júrgiziledi. Máselen, Buqar jyraý kóshesi boıymen Baızaqov pen Jarokov kósheleriniń aralyǵynda «Almaty sý» mekemesiniń tozyǵy jetken magıstraldy qubyrdy aýystyrý jobasy daıyn. «AJK» da Buqar jyraý kóshesinen Baızaqovqa deıingi aralyqty qazyp jatyr, biraq soltústik bóligin, olardyń dálizi bólek. Qoǵamdyq keńistikterdi damytý basqarmasy qasbetten qasbetke deıin kórkeıtý jobasyn iske asyrýǵa daıyn bolǵan. Alaıda mekemearalyq ózara is-qımyl barysynda «Almaty sý» jumystardy júrgizip jatqandyqtan, olar ázirshe kirispeıdi dep sheship, jobasy ýaqytsha toqtatyldy. Bıyl osyndaı úılestirý tájirıbesi engizildi, — dedi Azamat Qaldybekov.
Eske salaıyq, Almatyda 350 qurylys kompanııasynyń lıtsenzııasy toqtatyldy.
