Almatyda Qaırat Satybaldyǵa tıesili bolǵan qonaqúı taǵy da aýktsıonǵa qoıyldy
ALMATY. KAZINFORM – Almatyda buǵan deıin Qaırat Satybaldy memleketke bergen DoubleTree by Hilton qonaqúı kesheni úshinshi ret aýktsıonńa shyǵaryldy. Bul joly nysannyń bastapqy baǵasy 38,2 mıllıard teńgeden asady.
e-Qazyna portalynda jarııalanǵan aqparatqa sáıkes, qonaqúı kesheni qalanyń Almaly aýdanyndaǵy Dosmuhamedov kóshesi, 115 mekenjaıynda ornalasqan. Ǵımarattyń jalpy aýdany – 16 196,4 sharshy metr. Ol 0,2581 gektar jer ýchaskesinde ornalasqan.
Nysannyń bastapqy baǵasy - 38,278 mıllıard teńge. Kepildik jarnasy – 1,914 mıllıard teńge. Al saýda barysynda nysan baǵasy eń kóp degende 8,932 mlrd teńgege deıin túsedi.
Aýktsıon 29 qazan saǵat 10:00-de bastalady. Ótinimderdi qabyldaý saýda bastalýyna bes mınýt qalǵanda aıaqtalady.
Satýshy – Qarjy mınıstrligi Memlekettik múlik jáne jekeshelendirý komıtetiniń Almaty qalasy boıynsha Memlekettik múlik jáne jekeshelendirý departamenti.
Jarııalanǵan málimetterge sáıkes, qonaqúı kesheniniń baǵalaý quny 12,759 mıllıard teńge, al balanstyq quny shamamen 4,781 mıllıard teńge.
Qonaqúı satylǵan kezde oǵan tıesili jer ýchaskesi avtomatty túrde satylmaıdy. Jerdiń quny qonaqúıdiń baǵasyna qosylmaǵan. Alaıda Jer kodeksine sáıkes, satyp alýshyǵa jerdi paıdalaný quqyǵy beriledi.
Sondaı-aq nysan baǵasyna jıhaz ben ózge de jyljymaly múlik kirmeıdi. Satyp alýshyǵa taýar belgileri, fırmalyq ataý, kommertsııalyq belgi, zııatkerlik menshik obektilerin paıdalaný quqyǵy jáne franchaızıng sharty boıynsha quqyqtar berilmeıdi.
Portal málimetinshe, nysanǵa qatysty shekteýler men tyıymdar joq. Sonymen birge «Sý jelisi» kommýnaldyq kásipornynyń paıdasyna jer ýchaskesine servıtýt belgilengen.
Eske salsaq, Qaırat Satybaldydan tárkilengen Kaisar Plaza ekinshi ret aýktsıonǵa qoıylǵan edi.
Sondaı-aq Almatyda Qaırat Satybaldyǵa tıesili bolǵan qonaqúı IT-habqa aınalatyny habarlandy.
