Almatyda Qaırat Satybaldyǵa tıesili bolǵan qonaqúı IT-habqa aınalady
ALMATY. KAZINFORM – Almatyda Esentaı ózeniniń jaǵasynda ornalasqan qonaqúı súrilmeıdi.
Buryn Qaırat Satybaldynyń menshiginde bolyp, keıin memleket qaraýyna ótken nysan súrile bastaǵany týraly aqparat BAQ betterinde tarady. Alaıda Almaty ákimdigi bul málimetti joqqa shyǵardy.
Qala ákimdiginiń málimetinshe, ǵımarat nashar kúıde bolǵan. Sondyqtan onda qazir keshendi jóndeý jumystary júrgizilip jatyr. Atap aıtqanda: qasbeti pen tereze tustary qalpyna keltirilip, ishki bólmeleri jóndele bastady. Sondaı-aq irgeles aýmaq kógaldandyrylyp, abattandyrylyp jatyr. Joba aıasynda ǵımarat kúrdeli jóndeýden ótip, keıin paıdalanýǵa berilmek.
Almaty ákimdigi zamanaýı nysandarǵa degen qajettilikti eskere otyryp, buǵan deıin jekemenshikte bolǵan jáne bos turǵan ǵımaratty súrip tastaýdyń ornyna ony tıimdi paıdalaný týraly sheshim qabyldanǵanyn atap ótti.
- Jobanyń ınvestory — «LeanQor» JShS. Osy joba sheńberinde «Almaty» ÁKK» AQ ǵımaratty jóndeý jumystaryn júrgizip, keıin qoldanysqa engizý úshin usynyp otyr. Jóndeý jáne ózge de qajetti jumystardy qarjylandyrý ınvestordyń óz qarajaty esebinen júzege asyrylady. Almaty IT-haby jobasy Memleket basshysynyń IT men AI ınfraqurylymyn damytý, osy salalarda kadrlar daıarlaý jáne quzyretterdi arttyrý jónindegi tapsyrmasyna sáıkes júzege asyrylyp jatyr, - dep habarlady ákimdikten.
Qala basshylyǵynyń baspasóz qyzmeti jobany iske asyrý qoldanystaǵy nysandy utymdy paıdalanýǵa jáne IT, jasandy ıntellekt pen sabaqtas baǵyttardy damytýǵa arnalǵan ınfraqurylym qurýǵa múmkindik beretinin málimdedi.
Joba aıaqtalǵannan keıin ǵımarat pen jer telimin Almaty qalasynyń Tsıfrlandyrý basqarmasyna berý josparlanǵan.
- Bolashaqta bul nysan tsıfrlandyrý jáne jasandy ıntellektini damytý salasyndaǵy memlekettik baǵdarlamalardy júzege asyrýǵa, sondaı-aq IT, AI, kreatıvti ındýstrııa jáne basqa da sabaqtas salalarda jumys isteıtin rezıdentterdi ornalastyrýǵa paıdalanylady, - delingen habarlamada.
Eske salaıyq, buǵan deıin Qaırat Satybaldydan qaıtarylǵan qonaqúıge Almaty sottaryn ornalastyrý máselesi de qarastyrylǵan bolatyn.
