Almatyda «Qaırat» – «Pafos» matchy aldynda qaýipsizdik sharalary kúsheıtildi
ALMATY. KAZINFORM – Almaty polıtsııasy Ortalyq stadıonda ótetin «Qaırat» pen kıprlik «Pafos» komandalary arasyndaǵy match qarsańynda qaýipsizdik sharalaryn kúsheıtti.
Qalalyq polıtsııa departamentiniń qyzmetkerleri qoǵamdyq tártipti saqtaý, trıbýnalardaǵy tártipti baqylaý jáne stadıon mańyndaǵy jol qozǵalysyn retteý baǵyttarynda tolyq quramda jumys isteıdi.
Polıtsııanyń málimetinshe, fýtbol matchy kezinde kólik qozǵalys jartylaı shektelýi múmkin. Vedomstvo ókilderi sol sebepti turǵyndar men jankúıerlerge baǵytyn aldyn ala josparlap, ýaqytsha sharalarǵa túsinistikpen qaraýdy eskertti.
– Almaty polıtsııasy fýtbol keshiniń tynysh ári jaıly ótýi úshin barlyq qajetti sharany qabyldap otyr. Qaýipsizdik tek tártip saqshylaryna emes, azamattardyń óz jaýapkershiligine de baılanysty. Jankúıerlerden tártip saqtap, polıtsııamen yntymaqtastyq tanytýdy suraımyz, - dedi Almaty polıtsııa departamenti qoǵamdyq qaýipsizdik basqarmasy bastyǵynyń orynbasary Tımýr Noǵaıbaev.
Aıta keteıik, «Qaırat» – «Pafos» matchy 21 qazanda Ortalyq stadıonda saǵat 21:45-te ótedi.
Buǵan deıin match bıleti satylymǵa shyqqanyn jazǵanbyz.