Almatyda qaı jerlerge qurylys júrgizýge tyıym salynady
ALMATY. KAZINFORM — Almatyda jańa qurylys erejeleri men qala qurylysy reglamenti ázirlenip, megapolıstegi qurylysqa qatań shekteýler engizilip jatyr. Bul týraly Almaty ákimi Erbolat Dosaev aıtty.
— Meniń ákim retinde jumysym núkteli qurylys máselesinen bastaldy. Memleket basshysynyń tapsyrmasymen 19 nysan anyqtalyp, olarmen jumys júrgizildi, keıbirin buzdyq, keıbirin satyp aldyq. Barlyq másele sheshildi. Jańa qurylys erejeleri men qala qurylysy reglamentinde biz bul máselelerdi bekittik, — dedi qala ákimi.
Jalpy, 2022 jyldyń basynan bastap Almatyda qurylysqa baqylaýdy kúsheıtý aıasynda barlyǵy 69 qurylys nysany, onyń ishinde 26 turǵyn úı jáne 43 kommertsııalyq nysan, tolyq nemese jartylaı buzyldy.
Negizgi buzýshylyqtar — ruqsat berý qujattarynyń tolyq bolmaýy jáne kelisilgen jobalyq eskızderden aýytqýlar. Mundaı nysandardy buzý sot sheshimimen júrgiziledi.
— Biz úlken jumys atqardyq. Jańa qurylys erejeleri men qala qurylysy reglamentin ázirledik, olar qalada qurylysqa qatal shekteýler engizedi, ıaǵnı núkteli qurylys, taý bókterlerin, jasyl aımaqtardy jáne aýla aýmaqtaryn salýdy múmkindiginshe boldyrmaıdy, — dedi Erbolat Dosaev.
Mysaly, Abaı dańǵyly men ál-Farabı dańǵyly arasyndaǵy aýmaqta 9 qabattan joǵary turǵyn úıler salýǵa tyıym salynady, tek erekshe nysandarǵa ruqsat beriledi.
Qurylys tek qoǵamdyq mańyzy bar, turaqtylyq pen ekologııalyq sheshimderdiń saqtalýyn qamtamasyz etetin, energııa tıimdi jáne resýrsty únemdeıtin tehnologııalardy qoldanatyn jobalyq negizdeme bolǵan jaǵdaıda ǵana júzege asyrylady.
Shyǵys aınalma avtomobıl jolynyń ońtústik bóliginde, ál-Farabı dańǵyly, Saın jáne Jandosov kósheleriniń boıynda, 15 gradýs jáne odan joǵary eńistegi taý betkeılerinde qurylysqa tyıym salynady. Rekonstrýktsııa kezinde terrasalar men tehnıkalyq qabattardy qaıta qurylymdaýǵa da ruqsat joq.
— Qalada III klasstan tómen turǵyn úı salynbaıdy. Barlyq turǵyn úılerdiń núkteli ornalastyrylýy men aýla aýmaqtaryndaǵy qurylys toqtatylady.
Buǵan qosa, jańa erejeler memlekettik organdardyń kópqabatty turǵyn úılerdi qabyldaý jáne paıdalaný jónindegi baqylaý fýnktsııalaryn kúsheıtedi, sondaı-aq, sáýlet-qurylys baqylaý organdarynyń ókilettikterin keńeıtedi, — dep atap ótti ákim.
Qazir qurylys erejeleri men qala qurylysy reglamenti ashyq túrde talqylaýǵa usynyldy. Jyl sońyna deıin olar máslıhat depýtattaryna usynylatyn bolady. Eger maquldansa, 2025 jyldyń basynan bastap kúshine enedi.
— Eger máslıhat jańa qurylys erejelerin maquldasa, biz qalada jumys isteıtin negizgi sharttardy túbegeıli bekitemiz jáne jeke tulǵalardyń máselesin sheshemiz. Olar búgingi kúni retteý aımaǵynan tysqary qalyp, taý bókterin kesip, jańa úıler salyp jatyr. Bul eń aldymen olardyń qaýipsizdigi úshin mańyzdy, — dedi Erbolat Dosaev.
Aıta keteıik, buǵan deıin Dosaev Almaty metrosynyń qurylysyn jalǵastyrý úshin qarjy kerek ekenin aıtty.