Almatyda káýaphanalar qyzmetine ózgerister engiziledi

ALMATY. KAZINFORM – Almaty ákimi Erbolat Dosaev Jetisý aýdany turǵyndarymen kezdesýde qaladaǵy káýaphanalardyń jumysyna qatysty turǵyndardyń shaǵymyna jaýap berdi.

Shahar basshysy bıyl naýryz aıynda máslıhatqa Almaty qalasynyń atmosferalyq aýasyn qorǵaý erejeleri engiziletinin aıtty. Bul erejelerde gıdrofıltrlerdi ornatý talaptary men baqylaý sharalary qarastyrylǵan.

– Byltyr biz osyndaı bastama kóterdik, ol qoldaý tapty. Zańnamaǵa engizilgen ózgerister aıasynda bul erejelerdi máslıhatqa usynyp otyrmyz. Eger olar qabyldansa, bizde naqty jumysty bastaýǵa qajetti quraldar paıda bolady. Buǵan deıin aıtqanymdaı, negizsiz kásipkerlerdiń qyzmetine aralasýǵa quqyǵymyz joq. Al erejeler bekitilse, biz oǵan sáıkes jumys isteı alamyz, – dedi Erbolat Dosaev.

Óz kezeginde aýdan turǵyny káýaphanalardaǵy gıdrofıltrlerdi gazǵa aýystyrýdy usyndy.

– Bul jumystyń ekinshi kezeńi. Qazirgi basty másele – káýaphanalardyń qyzmetin retteýge baılanysty ózgerister engizý. Gazǵa kóshý máselesin keıinirek talqylaımyz. Bul máselege aýdan ákimderin qosamyn, olar atalǵan mekemelerdegi fıltrlerdiń jumysyn baqylap otyrady, – dep sózin túıindedi qala ákimi.

Osyǵan deıin káýap ısine tunshyqqan Bostandyq aýdanynyń turǵyndary ákimge shaǵymdanǵan bolatyn.

Sondaı-aq Erbolat Dosaev jumys istep jatqan kafelerden shyqqan tútin másele qalaı sheshiletinin aıtqan edi.