Almatyda káýaphana ıelerine aıyppul salyndy

ASTANA. KAZINFORM — Almaty qalasynyń Jetisý aýdanynda júrgizilgen tekseris kezinde qatty otynmen jumys istegen birneshe káýaphana anyqtaldy. 

Jetisý aýdanynyń sanıtarııalyq-epıdemıologııalyq baqylaý basqarmasy birneshe káýaphananyń sanıtarlyq normalardy buzǵanyn tirkedi. Turǵyndar qoıý tútin men antısanıtarııalyq jaǵdaıǵa baılanysty shaǵym túsirgen.

Shaǵymdardyń biri Nazarbaev kóshesi, 28A mekenjaıyndaǵy nysanǵa qatysty boldy. Turǵyndar nysandaǵy antısanıtarııa men mangaldan shyqqan qalyń tútinge narazylyq bildirgen.

«Tekserý barysynda «Aıana» káýaphanasynda birqatar sanıtarlyq talaptardyń buzylǵany anyqtaldy. Olardyń qatarynda qyzmetti habarlama bermeı júrgizý, qatty otynmen janatyn mangaldy paıdalaný, qoqys konteıneriniń bolmaýy, deratızatsııa sharalarynyń júrgizilmeýi, nysan ishinde ushatyn jándikterdiń bolýy syndy buzýshylyqtar bar», - dep habarlady basqarma.

Nysan ıesine 68 810 teńge aıyppul salynyp, nusqama berildi. Qaıta tekserý kezinde talaptar oryndalmaǵany anyqtalyp, sot qosymsha 393 200 teńge aıyppul taǵaıyndady.

Serikov kóshesi, 41 mekenjaıyndaǵy «Altyn qazan» da tekseristen ótti. Káýaphananyń qatty otynmen janatyn mangaly turǵyn úılerge japsarlas ornalasqan. Bul sanıtarlyq talaptardy buzady jáne turǵyndarǵa qolaısyzdyq týdyrady. Basshylyqqa 314 560 teńge aıyppul salynyp, nusqama berildi. Qaıta tekserý kezinde mangal áli de jumys istep turǵany anyqtalyp, sot 275 240 teńge qosymsha aıyppul taǵaıyndady.

«Osy mekenjaıǵa qara kúıe men tútinge qatysty taǵy da shaǵym tústi. Tekserý barysynda buzýshylyqtar qaıta rastaldy», - delingen habarlamada.

Kásipkerge taǵy bir hattama toltyrylyp, 314 560 teńge aıyppul salyndy. Materıaldar mangaldy paıdalanýǵa tyıym salý máselesin qaraý úshin sotqa jiberildi. Sot qatty otynmen janatyn mangaldy qoldanýǵa tyıym salý týraly sheshim shyǵardy.

Aýdandyq sanıtarlyq baqylaý basqarmasy mundaı buzýshylyqtardy anyqtaý boıynsha jumys jalǵasatynyn málimdedi. Sebebi qatty otynmen jumys isteıtin mangaldar shamadan tys tútin shyǵaryp, aýa sapasyn nasharlatady jáne sanıtarlyq normalardy buzady.

Aıta keteıik, Almatydaǵy birqatar iri saýda jelisi baǵany negizsiz ósirgeni úshin jaýapqa tartyldy.