Almatyda qatty turmystyq qaldyqtardy shyǵarý tarıfi ózgeredi
ALMATY. KAZINFORM – Almaty máslıhatynyń sessııasynda halyq úshin qatty turmystyq qaldyqtardy jınaý, tasymaldaý, suryptaý jáne kómý qyzmetterine arnalǵan qoldanystaǵy tarıfterge ózgeris engizý týraly sheshim jobasy qaraldy.
Almaty ekologııa jáne qorshaǵan orta basqarmasynyń basshysy Serik Ádilbaevtyń aıtýynsha, tarıfti túzetý qajettiligi Qazaqstan Respýblıkasynyń salyq zańnamasyna engizilgen ózgeristerge baılanysty týyndaǵan.
– Tarıftiń ózgerýi qosylǵan qun salyǵynyń (QQS) 12%-dan 16%-ǵa deıin ósýine ǵana baılanysty. Sonymen qatar áleýmettik osal sanattaǵy azamattarǵa qatty turmystyq qaldyqtardy shyǵarý qyzmetteriniń aqysyn tóleýde jeńildikter qarastyrylǵan, - dedi Serik Ádilbaev.
Onyń aıtýynsha, 2026 jyly 1 qańtardan bastap QQS mólsherlemesiniń ulǵaıýyn kózdeıtin salyq zańnamasyndaǵy ózgerister kúshine endi. Bul qaldyqtardy basqarý salasyndaǵy qyzmetterdiń ózindik qunyna áser etti.
Tarıfke engizilgen túzetýler tek QQS mólsherlemesiniń ósýine baılanysty jasaldy. Tarıftiń qalǵan quramdas bólikteri ózgerissiz qalady. Sonyń nátıjesinde tarıf shamamen 3,6% ósedi.
Sonymen qatar sheshim jobasynda azamattardyń keıbir sanattaryna áleýmettik qoldaý sharalary qarastyrylǵan:
• Uly Otan soǵysynyń qatysýshylary qatty turmystyq qaldyqtardy shyǵarý qyzmetiniń aqysynan tolyq bosatylady;
• Uly Otan soǵysyna qatysýshylarǵa teńestirilgen adamdarǵa, I toptaǵy múgedektigi bar adamdarǵa, bala kezinen múgedektigi bar azamattarǵa, erekshe qajettiligi bar balalar men jetim balalardyń ata-analaryna jáne zańdy ókilderine 50%-dyq jeńildik beriledi;
• II toptaǵy múgedektigi bar adamdarǵa, halyqtyń áleýmettik osal toptarynyń ókilderine 25%-dyq jeńildik qarastyrylǵan.
Almaty máslıhatynyń depýtattary bul sheshim jobany qoldady.
Eske salaıyq, buǵan deıin Astanada elektr energııasynyń tarıfin kóterý máselesi qoǵamdyq tyńdaýda qaralǵanyn habarlaǵan edik.
