Almatyda qatty otyn qoldanatyn káýaphanalarǵa baqylaý kúsheıdi
ALMATY. KAZINFORM — Almatynyń sanıtarlyq qyzmeti qatty otynmen jumys isteıtin qoǵamdyq tamaqtaný oryndaryna 12 jospardan tys tekseris júrgizdi.
Almatynyń ekologııa jáne qorshaǵan orta basqarmasynyń málimetinshe, 10 ekologııalyq quqyq buzý anyqtaldy. Jeti nusqama berilip, eki fakti boıynsha materıaldar sotqa joldandy. Barlyǵy 1 887 360 teńge kóleminde segiz ákimshilik shara qoldanyldy.
Eco Almaty JShS mamandarynyń aıtýynsha, mundaı nysandar shamadan tys tútin men ıis shyǵaryp, jaqyn mańdaǵy úılerdiń turǵyndaryna qolaısyzdyq týdyrady.
— Káýaphana ıelerimen turaqty túrde túsindirý jumysy júrgiziledi: qatty otyndy paıdalanýǵa tyıym salynǵan, al gazben jumys isteıtin jabdyqtarda mindetti túrde súzgiler ornatylýǵa tıis. Eco Almaty tarapynan baqylaý atmosferalyq aýany qorǵaý jónindegi is-sharalar josparyna sáıkes júzege asyrylady, — delingen habarlamada.
Sonymen qatar sanıtarlyq talaptar men qalany kóriktendirý erejeleriniń saqtalýyn baqylaý aıasynda Ekologııa jáne qorshaǵan orta basqarmasy men Almaty polıtsııa departamentiniń qyzmetkerleri qoǵamdyq tamaqtaný oryndaryna qoıylatyn qoldanystaǵy shekteýler týraly kásipkerlerge turaqty túrde túsindirý jumystaryn júrgizip otyr.
Eske salaıyq, buǵan deıin Almatynyń Jetisý aýdanynda júrgizilgen tekseris kezinde qatty otynmen jumys istegen birneshe káýaphana anyqtalyp, aıyppul salynǵanyn jazǵanbyz.