Almatyda qalyń qar jaýyp, tuman túsedi
ALMATY. KAZINFORM — Almatyda sársenbi kúni, ıaǵnı 8 qańtar kúni qar jaýyp, tuman jáne kóktaıǵaq bolady.

— «Qazgıdromet» RMK-nyń málimetinshe, 22 qańtarǵa qaraǵan túnnen bastap Almatyda qatty qar jaýyp, kóktaıǵaq bolýy múmkin. Aýa temperatýrasy túnde -5…-9 °S-qa deıin tómendep, kúndiz -2…0 °S shamasynda bolady. 23 qańtar túnde -15-ten -17°S-qa deıin, kúndiz -5-ten -7°S, keıde qatty qar jaýyp, tuman jáne kóktaıǵaq kútiledi, — dep habarlady ákimdikten.

Osyǵan baılanysty qalanyń kommýnaldyq qyzmetteri kúsheıtilgen jumys rejımine kóshýde. Óndiristik bazalarda táýlik boıy kezekshilik uıymdastyryldy. 204 qum taratqysh qar jaýa bastaǵanǵa deıin ornalasqan jerlerinde kezekshi bolady.
Negizgi magıstraldyq kósheler aldyn ala suıyq reagenttermen óńdeledi. Táýlik boıy 624 arnaıy tehnıka men 1380 jol jumysshysyn tartý josparda.

Budan basqa, joldardyń qaýipti ýchaskelerinde, jol aıryqtarynan shyǵatyn joldarda qar kóshkinderiniń aldyn alý jáne joıý úshin 47 jedel brıgadanyń kúshimen jol jamylǵysynyń jaı-kúıin patrýldeý jónindegi jumys kúsheıtiletin bolady.
— Júrgizýshilerdi jyldamdyqty tómendetýge, kólikter arasyndaǵy qashyqtyqty saqtaýǵa shaqyramyz, — delingen habarlamada.

Aýdandyq ákimdikterde qar tazartý jumystaryna táýlik boıy monıtorıng júrgizý úshin shtabtar uıymdastyryldy.
Osyǵan deıin Qazgıdromet 21 qańtarda el aýmaǵynda bolatyn qaýipti meteorologııalyq qubylystarǵa boljam jasaǵan edi.