Almatyda kásipkerlerge arnaıy salyq rejıminiń jańa stavkasy bekitildi
ALMATY. KAZINFORM — Almatyda qalalyq máslıhattyń kezekti HHHVIII sessııasy ótti.
Sessııa barysynda Almatyda arnaıy salyq rejımin qoldaný kezinde salyq mólsherlemesin tómendetý máselesi qaraldy.
Almaty qalasy Kásipkerlik jáne ınvestıtsııalar basqarmasynyń basshysy Berikbol Mándibaevtyń aıtýynsha, 2026 jyly kúshine enetin jańa Salyq kodeksinde ońtaılanǵan salyq jáne bólshek salyq rejımderi 4% mólsherinde belgilengen. Alaıda jergilikti máslıhattarǵa salyq mólsherlemesin 50% sheginde kóbeıtýge ne azaıtýǵa quqyǵy bar.
— Máslıhat ony 2%-ǵa deıin tómendete nemese 6%-ǵa deıin kótere alady. Bul óz qalamyz úshin ońtaıly mólsherlemeni aıqyndaýǵa múmkindik beredi. Arnaýly salyq rejımderin qoldanatyn kásipkerlerden túsetin ótinishter artyp otyr. Olar bazalyq stavkanyń 4% deńgeıine kóterilip, salyq júktemesiniń ósýine alańdaýshylyq bildirdi. Kásipkerler qazirgi qoldanylyp júrgen ońaılatylǵan deklaratsııa rejıminiń stavkasy 3% ekenin jáne Almatydaǵy shaǵyn bıznestiń basym bóligi dál osy rejımde jumys isteıtinin atap ótti, — dedi ol.
Berikbol Mándibaev jańa rejım aldymen B2C sektorynda jumys isteıtin kásipkerlerge: úı janyndaǵy dúkender, turmystyq qyzmet kórsetý oryndary, shashtarazdar jáne basqa da shaǵyn kásipke baǵyttalǵanyn atap ótti.
— 44 qyzmet túrinen turatyn tyıym salynǵan tizbe bekitildi. Oǵan enbegen kásipkerlerge arnaýly rejımdi qoldanýǵa ruqsat beriledi. Osy faktorlardy eskere otyryp, 2026 jyly arnaýly salyq rejımin qoldanatyn barlyq kásipkerler úshin stavkany 3% deńgeıinde belgileýdi usynamyn, — dedi ol.
Vedomstvo basshysynyń aıtýynsha, qazir Qazaqstannyń kópshilik óńirleri salyq mólsherlemesin tómendetý quqyǵyn paıdalanǵan. 19 óńir stavkany 2–3% deńgeıinde bekitken. Olardyń qatarynda Astana jáne Shymkent qalalary bar.
Almaty qalasy ákiminiń orynbasary Oljas Smaǵulov sessııa barysynda «salyq mólsherlemesiniń tómendeýi bıýdjet kirisin azaıtpaı ma» degen suraqqa jaýap berdi.
— Bul másele eń kúrdeli suraqtardyń biri boldy. Sebebi 200 myń almatylyq kásipkerdiń taǵdyry tur. Biraq bul sheshim búginde kóleńkede júrgen kásipkerlerdiń ashyq jumysqa kelýine yqpal etedi, sondaı-aq kásipkerlerdiń basqa óńirlerge tirkelýiniń aldyn alýǵa múmkindik beredi. Jalpy alǵanda biz salyq bazasynyń tómendeýin emes, jyl ishinde onyń ósýin kútýdemiz., — dedi ol.
Almaty máslıhatynyń depýtattary qala ákimdiginiń sheshimine qoldaý bildirdi.
Eske salaıyq, 2026 jyldan bastap elimizde jańa Salyq kodeksi kúshine enedi. Premer-mınıstrdiń orynbasary — Ulttyq ekonomıka mınıstri Serik Jumanǵarın ońaılatylǵan salyq rejıminde jumys istep kelgen kásipkerlerdiń basym bóligi úshin jaǵdaı ózgermeıtinin aıtty.