Almatyda kásipkerlerge 5 mln teńge grant beriledi

ALMATY. KAZINFORM – Almatyda kásipkerlikti damytýǵa qatysty konkýrs jarııalandy. Ótinimder 14-18 qazan aralyǵynda qabyldanady.

Uıymdastyrýshysy – Almaty qalasy kásipkerlik jáne ınvestıtsııalar basqarmasy. Konkýrsqa ótinimder «Elektrondyq úkimet» veb portalynda ornalasqan, «Kezekte.kz» aqparattyq júıesi arqyly qabyldanady.

«5 mln teńgege deıingi mólsherdegi óteýsiz negizde memlekettik granttar «Bir aýyl – bir ónim» baǵdarlamasynyń fınalısteri bolǵan áleýmettik kásipkerlik sýbektilerine, shaǵyn jáne orta kásiporyndarǵa beriledi. Konkýrstyń jalpy bıýdjeti - 500 mln teńge»,- dep atap ótti Almaty ákimdiginen.

Konkýrstyq qujattama 2024 jyldyń 14-18 qazan aralyǵynda qabyldanady.

Uıymdastyrýshylar atalǵan merzimnen keshiktirilip túsken tapsyrystar qabyldaýǵa alynbaıtynyn eskertedi.

Baıqaýdyń maqsaty-áleýmettik mańyzy bar jobalardy qoldaý jáne qalada shaǵyn jáne orta kásipkerlikti damytý.

Osyǵan deıin, Almatyda startaptar men IT ekojúıesin damytý jobasy aıasynda jyl basynan beri 2,5 mlrd teńge ınvestıtsııa tartylyp, 217 jańa jumys orny qurylǵany týraly jazǵan edik.