Almatyda kásipkerlerge 2 jáne 6 paıyzben nesıe beriledi

ALMATY. KAZINFORM - Megapolıste «Almaty Business-2025» kásipkerlikti damytýdyń óńirlik baǵdarlamasy boıynsha nesıe berilip jatyr.

«Almaty» mıkroqarjy uıymy usynǵan baǵdarlama sheńberinde shaǵyn kásipkerlik sýbektiler jyldyq 2% jáne 6% mólsherleme boıynsha nesıe ala alady.

Osy jyldyń birinshi toqsanynda jergilikti bızneske 572 mln teńge somasynda qaryz berilgen. Nesıelerdiń úshten birinen astamy óndiris jáne qaıta óńdeý salasyndaǵy jobalarǵa tıesili boldy. Sondaı-aq halyqqa qyzmet kórsetýge baǵyttalǵan bastamalar (21%), týrızm jáne bilim berý salalaryndaǵy jobalar (14%) qarjylandyryldy.

«Almaty» mıkroqarjy uıymy bir kásipkerge usynatyn eń joǵary qaryz somasy - 78 640 000 teńge. Qaryz merzimi - 7 jylǵa deıin. Baǵdarlamaǵa qatysýdyń negizgi sharty — Almaty qalasynyń aýmaǵynda bıznesti tirkep, júrgizý qajet. Sondaı-aq óndiris jáne qaıta óńdeýge qatysty, áleýmettik salalardaǵy, ımport almastyrýǵa, eksportqa, kreatıvti ındýstrııalarǵa baǵyttalǵan bastamalarǵa basymdylyq beriledi.

Jeńildetilgen nesıeleý baǵdarlamasy týraly tolyǵyraq veb-saıt arqyly bilýge bolady: https://mfoalmaty.kz

Eske salaıyq, Úkimet jeke kásipkerlikti tirkeý rásimin qatańdatpaq.