Almatyda qarjy pıramıdasyna aldanǵandar 110 mln teńgeden aıyryldy
ASTANA. KAZINFORM — QMA Almaty qalasy boıynsha departamenti «Boxy Wealth» qarjy pıramıdasyn qurý jáne oǵan basshylyq etý faktisi boıynsha tergeýdi aıaqtady.
Tergeý barysynda kúdiktiniń bir jyl boıy Almaty qalasy aýmaǵynda osy jobanyń qurylymdyq bólimshesin basqarǵany anyqtaldy. Joba «www.boxywealth.com» ınternet-resýrsy jáne messendjerler arqyly jumys istegen. Sonyń ishinde «Kúndelikti tabys» chatynda bastapqyda halyq tutynatyn taýarlar týraly aqparat taratylyp, keıin azamattardy ınvestıtsııalyq platformaǵa tartý júzege asyrylǵan.
Qatysý úshin paıdalanýshylarǵa túrli paketterdiń birin satyp alyp, kún saıyn jarnamalyq materıaldardy qaraý usynylǵan. Bul rette táýligine 5%-dan 10%-ǵa deıin tabys ýáde etilgen. Sonymen qatar jańa qatysýshylardy tartqany úshin bonýs beriletin referaldyq júıe jumys istegen. Qarajattardy qabyldaý jeke tulǵalardyń (dropperlerdiń) bank shottary arqyly júrgizilip, keıin P2P operatsııalar arqyly krıptovalıýtaǵa aýdarylǵan.
Senim qalyptastyrý maqsatynda kompanııa tirkelip, keńse ashylǵan, jarnamalyq jumystar júrgizilgen, «tabys» kórsetkishteri kórsetilip, salymshylarǵa keńes berý uıymdastyrylǵan. Nátıjesinde 78 jábirlenýshi qarjy pıramıdasyna 110 mln teńgeden astam qarajat salǵan.
— Kúdikti qamaýǵa alyndy. Sot sanktsııasymen onyń Almaty qalasyndaǵy jer ýchaskesine tyıym salyndy. Qylmystyq is sotqa joldandy. QR Qylmystyq-protsestik kodeksiniń 201-babyna sáıkes ózge aqparat jarııa etilmeıdi, — delingen habarlamada.
Qarjylyq monıtorıng agenttigi azamattarǵa ınvestıtsııalyq jobalardyń zańdylyǵyn muqııat tekserýdi, usynylatyn aqparattyń shynaıylyǵyn baǵalaýdy jáne qarajat salmas buryn uıymdardyń qyzmetiniń zańdy ekenine kóz jetkizýdi usynady.
Budan buryn Almatyda «NBC TV» qarjy pıramıdasyna da qatysty tergeý júrgizilgen bolatyn.
